Digital mobbing er definert som ei aggressiv handling eller åtferd utøvd ved bruk av elektroniske hjelpemiddel av ei gruppe eller ein person – gjentatt over tid – mot eit offer som ikkje kan forsvare seg [1].

Slik er digital mobbing ei form for systematisk misbruk av makt utøvd gjennom bruk av informasjons- og kommunikasjonsteknologi (IKT).

Dette er ei utviding av definisjonen av tradisjonell mobbing som vert sett som handling gjort med hensikt for å skade ein annan person som har vanskeleg for å forsvare seg. Mobbing vert gjentatt over tid og er karakterisert av ulikt styrkeforhold mellom mobbaren eller mobbarane og offeret.

Digital mobbing er eit relativt nytt fenomen som særleg dei siste ti åra har fått auka fokus ettersom ulike tekniske hjelpemiddel har gitt nye former av mobbing. Særleg har smarttelefonane gitt heilt nye muligheiter for å utøve mobbing. Framleis er det gjort relativt lite forsking på feltet og ein må sjå digital mobbing som eit fagområde som framleis er i utvikling.

I praksis vert digital mobbing utøvd på mange ulike måtar gjennom mobiltelefonsamtalar, tekstmeldingar, bilde eller videoklipp, e-post, chat, nettsider eller sosiale media. Denne lista over ulike typar digital mobbing og aggresjon er ikkje uttømande, og ettersom teknologien vert utvikla, vil vi óg sjå nye former for digital mobbing. 

Digital mobbing skil seg frå tradisjonell mobbing på ulike måtar:

  • Til ei viss grad avheng høve til å utøve digital mobbing av teknisk ekspertise.
  • Digital mobbing er primært indirekte og føregår ikkje ansikt til ansikt og mobbaren kan såleis ofte vere anonym.
  • Utøvaren(ane) ser vanlegvis ikkje reaksjonen til offeret, i alle fall ikkje på kort sikt.
  • Ulike tilskodarroller ved digital mobbing er meir komplekse enn ved tradisjonell mobbing. Til dømes kan tilskodarar vere saman med utøvaren når handling vert utøvt eller posta, men saman med offeret når meldinga vert mottatt.
  • Eit motiv for tradisjonell mobbing er statusen ein oppnår ved å utøve makt over andre framfor vinter eller tilskodarar, men dette manglar ofte for  utøvaren av digital mobbing.
  • Bredda eller mengda av potensielle tilskodarar eller vitne er større ettersom digital mobbing kan nå eit stort publikum i og utanfor jamaldringsgruppa samanlikna med dei relativt små gruppene ein normalt når gjennom tradisjonell mobbing.
  • Det er vanskeleg å røme frå eller sleppe unna digital mobbing. Det er ingen trygg stad, ingen stad ein slepp unna. Det kan i prinsippet skje 24 timar i døgnet ettersom offeret kan få sendt meldingar til mobiltelefonen eller pc-en, eller vert negativt omtalt på nettsider, uansett kvar dei er.

Kilde

1. Definisjon frå Lonje, R; Smith,P.K. & Frisén, A.(2013) The nature of cyberbullying, and strategies for prevention. Computers in Human Behavior, 29, 26-32.

Smith, P. K. (red)(2013) Emotional and behavioural difficulties associated with bullying and cyberbullying. London: Routledge.

Samnøen, Ø. (red)(2012) Gode råd om barn, ungdom og medier. Oslo: Cappelen Damm.

Slonje, R; Smith,P.K. & Frisén, A.(2013) The nature of cyberbullying, and strategies for prevention. Computers in Human Behavior, 29, 26-32.

Foreslå endringer i tekst

Foreslå bilder til artikkelen

Kommentarer

Har du spørsmål om eller kommentarer til artikkelen?

Kommentaren din vil bli publisert under artikkelen, og fagansvarlig eller redaktør vil svare når de har mulighet.

Du må være logget inn for å kommentere.