Midtens rike

Midtens rike, eller meir presist Det sentrale riket, er norsk for Zhongguo, som no er det vanlegaste kinesiske namnet på Kina.

Fram til for om lag to hundre år sidan var det vanleg i Kina å bruka dynastiske namn ( altså namn som skiftar frå eit dynasti til eit anna) om det me i dag kallar Kina.

Før vår tidsrekning blei Zhongguo brukt om ulike område på dei nordkinesiske slettene. Etter kvart blei omgrepet brukt om det som er innanfor den kinesiske kulturområdet, i motsetnad til det som er utanfor dette, men frå Handynastiet (206 fvt.–220 evt.) til Ming (1368–1644) og Qing (1644–1911) var namnet lite brukt. Det var fyrst i møtet med europeiske statar i siste del av Qingdynastiet at namnet Zhongguo kom i vanleg bruk.

Mykje er skrive om namnet Zhongguo (中国), gjerne med det formål å skapa ei forståing av Kina som ein nasjonalstat i moderne tyding. Det er viktig å hugsa at namnet har hatt skiftande innhald opp gjennom tida.