Faktaboks

Åse Wetås
Fødd
25. juni 1972, Sandnes, Rogaland
Åse Wetås i 2017.
Åse Wetås i 2017.
Av /NTB.

Åse Wetås er språkforskar og leksikograf. Ho var i mange år prosjektdirektør for Norsk Ordbok og er sidan 2015 direktør i Språkrådet.

Bakgrunn

Åse Wetås er fødd i Sandnes i Rogaland. Etter eksamen ved Sandnes videregående skole i 1991 og eitt år på embetsstudiet i medisin blei ho i 1999 cand.philol. ved Universitetet i Oslo med hovudoppgåva Namneskiftet Kristiania–Oslo. I emnekrinsen har ho også human evolusjon og åtferdsbiologi. Wetås blei dr.art. same staden i 2008 med avhandlinga Kasusbortfallet i mellomnorsk. I åra 2011–2012 deltok ho på eit mentorprogram for yngre leiarar i staten i regi av Direktoratet for forvaltning og IKT (Difi).

Karriere

Wetås var vitskapleg assistent ved Høgskolen i Stavanger 1994–1995 og ved Universitetet i Oslo 1998–1999. I delar av tidsrommet 1996–1998 var ho først fagleg ungdomssekretær i Landsorganisasjonen i Norge (LO), region Rogaland, deretter som kontormedarbeidar same staden. Ho arbeidde som medarbeidar i stadnamntenesta i Norsk språkråd i 1996–1999 og hadde fleire kortare engasjement ved Høgskolen i Oslo, Universitetet i Oslo og Norsk språkråd 1999–2001 før ho var doktorgradsstipendiat ved Universitetet i Oslo 2001–2005.

Wetås blei tilsett som redaktør i Norsk Ordbok i 2005 og var prosjektdirektør same staden frå 2008. I perioden 2010–2011 var ho medlem i Språkrådets rettskrivingsnemnd for nynorsk, som i 2011 la fram forslag til den rettskrivingsnormalen for nynorsk som blei innført frå 2012. Wetås blei utnemnd som direktør i Språkrådet 3. juli 2015.

Andre verv

Ho var styremedlem i Norsk foreining for språkvitenskap 2002–2003 og hadde styreverv i Norsk namnelag frå 2003, frå 2006 som fast styremedlem. Wetås representerte Norsk Ordbok 2014 i Nynorsk Forum i 2008–2015. Frå 2009 var ho suppleant til styret i Nordisk foreining for leksikografi, frå 2010 medlem i redaksjonsrådet for Maal og minne og frå 2013 var ho medlem av fagrådet for Forskingssenter for skriftkultur ved Høgskulen i Volda. Wetås var styremedlem i Språkrådet 2010–2015.

Forfattarskap

Åse Wetås har redigert mange bøker og publisert ei lang rekkje vitskaplege og populærvitskaplege artiklar. Fleire av dei større skriftene er rapportar frå forskingskonferansar, men i 2015 redigerte ho også Maurens kulturhistorie saman med Torstein Kvamme.

Utmerkingar

I 1992 fekk Åse Wetås Fridthiov Oos’ legat for beste eksamensstil på nynorsk frå vidaregåande skule året før.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg