våradonis

Våradonis er ei fleirårig urt som vert mellom 20 og 30 cm høg. Dei nedste blada er skjelliknande, medan dei lengre opp på stengelen er finflika. Ho har store, gule blomar som vert mellom 4–8 cm i diameter og som sit toppstilt på planta. Blomane har mange blomedekkblad, pollenbærarar og fruktblad. Blomane er insektspollinerte, og fruktene som vert danna er smånøtter. Smånøttene har eit oljehaldig vedheng, eit elaiosom, og vert spreidd med maur. Forutan seksuell formeiring ved frø, kan planta formeirast vegetativt ved hjelp av underjordiske jordstenglar.

Stauda vert dyrka som hageplante, og har vore nytta som medisinplante. Ho har mellom anna blitt nytta som hjartemedisin, mot kjønnssjukdommar, mot menstruasjonssmerter og mot feber.

Våradonis veks naturleg i Mellom- og Sør-Europa opp til Öland og Gotland. I Sverige er planta freda. Våradonis er kalkkjær og ljoskrevjande, og veks ofte på open, tørr grasmark.

Våradonis trivest best i full sol til halvskugge og i tørr, kalkhaldig jord. Stauda er hardfør til H7

Våradonis er giftig og inneheld glykosid som kan påverke hjarta. Giftinformasjonen bør kontaktast om det er mistanke om at nokon har ete våradonis.

• Soleiefamilien
• Adonisslekta
• Staude

• Giftinformasjonen