sigma

Sigma er den 18. bokstaven (Σ, σ / ς) i det greske alfabetet. Bokstaven svarar til s i det latinske alfabetet.

Sigma har to ulike former når han vert skriven i små bokstavar (minusklar): I starten av og inne i ord bruker ein σ, i slutten av ord bruker ein ς. Det er berre ein ortografisk konvensjon som har ingenting å seia for uttala.

Sigma har verdien 200 i det greske talsystemet.

I matematikken bruker ein stor (majuskel) sigma, Σ, som symbol for ein sum. I statistikk bruker ein liten sigma, \(\sigma\), som symbol for standardavvik. Når ein elles skriv minuskel sigma i matematikk, kjemi, astronomi og so vidare, nyttar ein forma σ, ikkje ς.

I seinantikken og tidleg mellomalder var den mest utbreidde utforminga av sigma Ϲ, ϲ (måneforma sigma eller månesigma). Denne varianten er opphavet til den kyrilliske bokstaven С, с. Trass i den grafiske likskapen har månesigma ingen historisk samanheng med den latinske bokstaven C, c, som derimot stammar frå den greske bokstaven Γ (gamma).