Rundballene ligg ofte lagra synleg utandørs, og den kvite plasten kan fortone seg som blanke lerret.

Lisens: CC BY 2.0

Rundballe er gras som er pressa hardt saman i ein sylinderforma balle ved bruk av rundballepresse. Vanlegvis er både ballebreidda (lengda på sylinderen) og diameteren cirka 1,25 meter. Ballane blir pakka inn i plast, vanlegvis folieplast som blir lagd på i 6–8 lag, slik at plastinnpakkinga blir lufttett. Det er viktig for å oppnå riktig gjæring.

Faktaboks

Også kjend som

høyballe, traktoregg

Graset blir konservert ved mjølkesyregjæring til surfôr (silofôr), som blir nytta som fôr til drøvtyggjarar og hest. Ofte blir syre (maursyre) eller andre ensileringsmiddel tilsett for å senke pH-en i startfasen og motverke feilgjæring. Også halm og anna fôr kan pressast i rundballar og konserverast ved til dømes tilsetjing av ammoniakk, sjå halmluting.

Cirka 40 prosent av grovfôret i Noreg blir konservert som rundballar. Konserveringsmåten krev ingen faste anlegg, og heile innhaustingsarbeidet går føre seg maskinelt med slåmaskin, rundballepresse og pakkemaskin. Vanlegvis blir ballane samla og lagra utandørs. Kvit plast blir føretrekt, sidan kvitfargen reflekterer mykje av innstrålinga.

Plast i naturen er eit aukande miljøproblem, og landbruksnæringa har organisert innsamling av rundballeplast i regi av ei lang rekkje lokale mottaksstasjonar. I 2022 vart 87 prosent av rundballeplasten vunnen tilbake. Tilsvarande gjenvinningsgrad for plast i norske hushald er om lag 33 prosent.

Les meir i Store norske leksikon

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg