ringmur

Ringmur er ein frittståande murvegg som omgir eit definert område. Ringmurar blei oppførte som vern mot angriparar rundt byar og utbygde plassar eller slott i eldre tider. Dei er som regel forsynte med tårn med regelmessige mellomrom og med skyttargangar for forsvararane. Ein ringmur er som regel ei form for festning, men kan òg omgi eit bygningskompleks eller ein by, som bymur. Ein ringmur kan vere fordobla, med eit mellomrom (zwinger) mellom den indre og den ytre muren. Rundt nokre kyrkjer i Romania finst det tre ringmurar.

Ein ringmur dannar ei slutta planform med eit klart skilje mellom det som er innanfor og det som er utanfor, men dannar i utgangspunktet ikkje nokon definert geometrisk figur som til dømes ein «ring» eller sirkel, slik namnet ringmur skulle antyde.

Det finst talrike slike murar enno, til dømes den nedste delen av nesten heile muren rundt Tunsberghus. Best bevart og mest kjent i Norden er ringmuren rundt Visby på Gotland, der størstedelen framleis består i full høgd.