Paradigme er innanfor grammatikk det same som eit bøyingsmønster, det vil seie ei liste over alle bøyingsformene til eit ord (eit leksem), ordna systematisk etter grammatisk innhald.

Faktaboks

Uttale
paradˈigme
Etymologi
av gresk parádeigma (παράδειγμα) 'eksempel, mønster'.
Også kjend som
paradigma

Her er fire norske eksempel, paradigma til substantiva hest og hus og verba bygge og synge:

grammatisk informasjon HEST HUS
eintal (singularis), ubunden (ubestemt) hest hus
eintal (singularis), bunden (bestemt) hesten huset
fleirtal (pluralis), ubunden (ubestemt) hestar hus
fleirtal (pluralis), bunden (bestemt) hestane husa
grammatisk informasjon BYGGE SYNGE
imperativ bygg synge
indikativ, presens bygger syng
indikativ, preteritum bygde song
perfektum partisipp bygd sunge
infinitiv bygge syng

Typiske eigenskapar ved paradigme

Paradigma ovanfor viser nokre typiske eigenskapar ved paradigme.

For det fyrste viser dei at i dei fleste paradigma har alle bøyingsformene same stamme, i dette tilfellet hest-, hus- og bygg-. Stamma til verbet synge er eit unnatak, sidan ho varierer i form mellom syng-, song- (bokmål sang-) og sung-.

Vidare viser dei at alle bøyingsformene i eit paradigme har forskjellig tyding. Dei har same leksikalske tyding, men ulik grammatisk tyding.

  • Bøyingsformene hesten og hestar viser begge til hovdyr av slekta Equus som blir brukt til trekk-, ride- og kløvdyr, men hesten er bunden, eintal og hestar er ubunden, fleirtal.
  • Bøyingsformene til verbet huse har det leksikalske tydinga 'gi husly, losjere', og høyrer ikkje til same paradigmet som substantivet hus, som har ei anna leksikalsk tyding, nemleg 'bygning (med tak og vegger) brukt til bu- eller tilhaldsstad for menneske og dyr, til lagringsstad og liknande'.

Enda eit poeng er at i dei fleste paradigma er alle bøyingsformene forskjellige, ved at dei til dømes har ulike affiks. Dersom nokre bøyingsformer er like, er ikkje dette karakteristisk for heile ordklassen. Paradigmet til substantivet hus er eit unnatak, sidan eintal, ubunden og fleirtal ubunden har same form. Dette er karakteristisk for inkjekjønnssubstantiv.

Paradigmet som modell

I tradisjonell grammatikk blei paradigme brukte som modellar for eller eksempel på korleis ord i ein særskild ordklasse eller bøyingsklasse skal bøyast, og det greske ordet parádeigma (παράδειγμα) tyder 'eksempel, mønster'. Når ein har lært å bøye hankjønnssubstantivet hest, kan ein òg bøye andre hankjønssubstantiv i same bøyingsklasse som hest.

Paradigmatisk relasjon

Paradigmatisk relasjon har ikkje direkte å gjere med paradigme i den tydinga som er skildra i avsnitta ovanfor, og er forholdet mellom einingar (som fonem, morfar eller ord) som kan bytast ut med kvarandre i språklege uttrykk. Her er nokre eksempel:

  • Fonema /p/ og /t/ står i ein paradigmatisk relasjon til kvarandre i /²ruːpe/ 'rope' og /²ruːte/ 'rote'.
  • Morfane /e/ (infinitiv) og /te/ 'preteritum' står i ein paradigmatisk relasjon til kvarandre i /²smiːl-e/ 'smile' og /²smiːl-te/ 'smilte'.
  • Orda kan og står i ein paradigmatisk relasjon til kvarandre i uttrykka ho kan gå og ho må gå.

Paradigmatisk relasjon står i motsetnad til syntagmatisk relasjon, som gjeld relasjonen mellom språklege einingar som følgjer etter kvarandre, som fonema i eit ord, morfane i eit ord eller orda i ei setning.

Manglande paradigmatisk relasjon i eit paradigme

Ord i eit bøyingsparadigme kan ofte bøyingsformene ikkje bytast ut med kvarandre, og står difor ikkje i ein paradigmatisk relasjon til kvarandre i den tydinga som er forklart her.

I setninga Ho kjøpte seg ei ny vogn kan ikkje vogn bytast ut med andre bøyingsformer av substantivet vogn, men derimot med ubunden, eintal av ei lang rekkje andre hokjønnsord, som dokke, bluse, skjorte, papegøye.

Les meir i Store norske leksikon

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg