landbrukssamvirke

Salssamvirka, til dømes Tine og Nortura, skal omsetje produkta rasjonelt og effektivt. Dei skal drive marknadsregulering etter retningslinjer frå Omsetningsrådet ved geografisk utjamning, lagring frå overskots- til underskotsperiodar, reguleringseksport eller reguleringsimport og dessutan prisutjamning for alternativ bruk av visse varer.

Samvirkeorganisasjonane tek på denne måten del i den offentlege forvaltninga av jordbrukspolitikken etter omsetningslova.

Innkjøpssamvirket («felleskjøpa») skal skaffe medlemene sine fullverdige driftsmiddel, mellom anna mineralgjødsel, kraftfôr, såvarer og maskinar, til rimelege prisar. Innkjøpssamvirket driv òg forsøksverksemd på fleire område, som møller, kornsiloar, produksjon av teknisk utstyr og fôrblandingar med meir. Felleskjøpa var organiserte i distriktsorganisasjonar med Norske Felleskjøp som fellesorgan fram til 2020. Norske Felleskjøp blei då avvikla som eige selskap, og aktivitetane blei lagde til Felleskjøpet Agri SA, som er produsentsamvirket for korn med ansvar for marknadsreguleringa for korn. Denne endringa blei gjort av omsyn til samvirkelova. Det er no to Felleskjøp i Noreg: Felleskjøpet Rogaland Agder og Felleskjøpet Agri SA.

Landkreditt SA er eit samvirkeføretak eigd av 10 500 næringsdrivande bønder, der kriteria for medlemskap er knytte til samhandling med definerte produkt i dotterselskapet Landkreditt Bank AS. Føremålet til Landkreditt er å betre økonomien til medlemene og kundane gjennom å tilby gode finansløysingar til landbruket.

Gjensidige Forsikring er med røter i bygdebrannkassene blant Noregs eldste samvirketiltak frå byrjinga av 1800-talet. Konsernet har ein sterk posisjon i landbruksmarknaden når det gjeld forsikring for bønder og samvirkebedriftene.

Geno SA er eigd av 10 500 norske storfebønder som er organiserte i samvirke. Genos hovudoppgåver er avl og utvikling av NRF-kua (norsk raudt fe). I dette ligg forsking og utvikling og drift av avlssystem.

Norsvin er eit samvirkeføretak (SA) eigd av 1563 norske svineprodusentar. Norsvin er eit internasjonalt avlsselskap, med utvikling, produksjon og sal av svinegenetikk som viktigaste oppgåver.