Kettlebell. Av . Begrenset gjenbruk

kettlebell (kuleløfting)

Ei vanleg øving med kettlebell er kettlebellsving, kor ein svinger kula frå bak mellom beina opp til i brysthøgde (engelsk: swing). Biletet syner utgangsposisjonen for øvinga.
kettlebell
Av .

Artikkelstart

Kettlebell eller kuleløfting er ein styrkeidrett der utøvarane trener og konkurrerer med kuleforma frivekter festa til eit bøylehandtak. Idretten har sitt opphav frå Russland.

Aktivitet og trening

Ein kettlebell ser ut som ei kanonkule med handtak, eventuelt ei tekanne utan tut, derav det engelske namnet. Denne kula kan kettlebellutøvaren svinge mellom beina. Dermed får han trent kjernemusklane rundt ryggsøyla, samstundes som heile kroppen er i bruk. Utøvaren kan òg svinge, kaste og løfte kettlebellkula på eit utal andre måtar.

For å styre og halde kontroll på kula må personen arbeide slik at han trenar både styrke og kondisjon på éin gong. Bevegelsane er dessutan gode for stabilitet og mobilitet, og kettlebells har difor også vore mykje brukt til rehabilitering.

Kettlebells er laga av jern eller stål, og kulene kjem i to typar, som iron cast og pro line. Desse er til bruk i høvesvis trening og konkurranse. Utøvaren kan justere treningseffekten med val av øving og tyngde på kulene.

Dei vanlegaste øvingane

Øving Bevegelse
Sving Svinge kula frå bak mellom beina opp til brysthøgde (engelsk: swing)
Vending Svinge kula frå bak mellom beina til kvilestilling inntil brystet (engelsk: clean)
Press Løfte kula frå brystkvile til strak arm over hovudet med rolig kropp
Push press Løfte kula frå brysthvile til strak arm over hovudet med svikt i kroppen
Støt Løfte kula frå brystkvile til strak arm over hovudet ved hjelp av svikt i kroppen og knebøy (engelsk: jerk)
Vending og støt Ein kombinasjon av vending og støt (engelsk: long cycle)
Rykk Svinge kula frå bak mellom beina i ein jamn bevegelse opp til strak arm over hovudet (engelsk: snatch)
Knebøy Djupe knebøy med kula i brystkvile eller på strak arm over hovudet (engelsk: squat)

Historisk bakgrunn

Idretten kjem opphavleg frå Russland, der han går under namnet «girya», som betyr «vanskeleg» eller «tung ting». På 1700-talet dukka dette opp som det russiske namnet på kulene. Dei skal den gongen ha vore brukt som vektlodd i den russiske varehandelen. Etter kvart byrja arbeidarane å løfte og kaste dei for moro skuld, og seinare vart dei tatt i bruk til vektløfting.

Ein annan versjon av historia seier at kulene først vart brukt som kornknusarar og vektlodd under innhaustinga i landbruket. Gardsarbeidarane tok så kulene i bruk for å løyse opp stive og støle musklar, og dei fann ut at dei vart sterkare av dette.

Sidan 1940-talet har kettlebell vore nasjonalidrett i Russland, og mot slutten av 1900-talet hadde kettlebell som treningsform eit gjennombrot i USA.

I dag er kuleløfting eit vanleg innslag på treningssenter rundt om i Noreg, og det første noregsmeisterskapet i kettlebell vart arrangert i 2012.

Les meir i Store norske leksikon

Eksterne lenker

Kommentarer

Kommentaren din publiseres her. Fagansvarlig eller redaktør svarer når de kan.

Du må være logget inn for å kommentere.

eller registrer deg