Fiskeallergi er allergisk reaksjon mot fisk fordi immunsystemet reagerer feil. Det er ein av dei åtte vanlegaste matallergiane. Fiskeallergi er eit problem både i den vanlege befolkninga og som yrkessjukdom i fiskeindustrien.
Reaksjonen mot fisk kan vere ein matallergisk reaksjon etter inntak av mat som inneheld fisk, eller ein hudreaksjon som elveblest etter kontakt med fisk. Det kan òg vere ein reaksjon i luftvegane med astma eller høysnuesymptom etter at ein har pusta inn luft med støv eller damp som inneheld stoff frå fisk. Måten ein har hatt kontakt med fisk på under utviklinga av fiskeallergien, avgjer i stor grad om ein får matallergi, hudallergi eller luftvegsallergi.
Allergireaksjonen kan variere frå lette plager til alvorleg allergisjokk. Symptoma kan overlappe enten allergen frå fisk kjem inn med maten eller i lufta.
Mengda fisk som skal til for å løyse ut ein reaksjon, kan vere ørliten. Det kan vere nok å ete mat laga i ei steikepanne som er dårleg reingjort etter å ha vore brukt til fisk, eller å puste inn lufta på eit fisketorg.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.