Det var ein varsam start for avisa Tysnes som kom ut første gong i 1953, men som etter kvart har fått ein sterk posisjon i lokalsamfunnet.
Tysnes var ei av dei store utvandringsbygdene i tidlegare Hordaland, der mange busette seg i Midtvesten i USA. Dette prega bladet Tysnes. Ein av initiativtakarane var Nils Haaland, som hadde fått ideen til avisa i løpet av si tid i Amerika. Avisa skulle vere eit bindeledd mellom heimkommunen og dei som drog til Amerika.
To år tidlegare hadde nabokommunen Kvinnherad fått eiga lokalavis, Grenda, som kom ut i Rosendal, og som hadde eige prenteverk. Dette inspirerte folk på Tysnes, som i mai 1953 sende ut innbyding til eit møte der ein skulle drøfte avisspørsmålet. 21 sa seg interesserte alt på dette møtet, og med trykking i Rosendal kom det første nummeret av avisa Tysnes ut 4. juli same året.
I den første tida skulle avisa kome ut med to nummer i månaden, og årspengane skulle vere 10 kroner. Det var også semje om utgivaren skulle vere eit bladlag, sidan stiftarane meinte det var for vanskeleg å skipe eit lutlag for oppgåva. Tysnes fekk ein eineståande posisjon som feriestad etter 1960, med meir enn 1400 fritidshus på Tysnes, ein stor del bygde av bergensarar. Hyttefolket i øykommunen gir dermed eit fint tilskot til opplaget.
Bonde, forfattar, lokalpolitikar og kulturarbeidar Johannes Heggland var med frå starten og teikna logoen til avisa. Det var han som skreiv referatet frå det første avismøtet, og sidan skreiv han mykje for Tysnes. Ole Skaten kom til avisa som den første heildags tilsette i 1979, då den dugnadsdrivne avisa gjekk over frå éi utgåve annakvar veke til å bli ei vekeavis. Skaten arbeidde seinare nokre år som typograf i avisa Sunnhordland, før han i 1986 vart redaktør i Tysnes.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.