Tore Aleksandersen

Aleksandersen byrja trenarkarriera på 1990-talet. Mot alle odds leia han damelaget i moderklubben Aukra Volleyballklubb opp i toppen av eliteserien. Den vesle klubben tok bronse i serien i 1998 og 2001, i tillegg til at dei spelte tre cupfinalar. I 2001 reiste Aleksandersen vidare til USA, der han vann den profesjonelle ligaen med damelaget til Minnesota Chill.

Frå 2003 til 2008 var han trenar for damelaget til Schweriner SC i tysk Bundesliga. Her vart han tysk seriemeister og cupvinnar i 2006, før han i 2007 tok sølv i serien og eit nytt cupgull.

I 2009 reiste han heim til Noreg, der han heldt fram som trenar. Det enda allereie første året med NM-gull med KFUM Stavanger, før han kopierte bragden med UiS Volley i 2010. Aleksandersen tok seg samstundes av det norske kvinnelandslaget.

Frå 2010 var Aleksandersen igjen trenar for Schweriner SC, i tillegg til at han var trenar for det finske landslaget for damer. Schweriner vann igjen den tyske serien i sesongen 2010–2011, før romsdalingen reiste frå klubben for å ha fullt fokus på jobben som landslagstrenar for finnane.

Aleksandersen var frå 2012 til 2017 trenar for dei polske klubbane Impel Wrocław og BKS Stal Bielsko-Biała. I sesongen 2019–2020 trente han den tyrkiske klubben Nilüfer Belediyespor.

I desember 2020 overtok han trenarjobben for damelaget i den tyske Bundesliga-klubben Allianz MTV Stuttgart. Aleksandersen hadde først kontrakt med klubben fram til 1. mai 2021. Denne vart på våren forlenga med eitt år, og i mars 2022 leia han Stuttgart til finale i CEV-cupen. Det enda med europacupsølv, etter at det tyske laget tapte mot tyrkiske Eczacibasi Dynavit Istanbul. Aleksandersen leia den same våren Stuttgart til gull i både Bundesliga og den tyske cupen.

I mai 2023 var Aleksandersen trenar då Stuttgart igjen vart tyske seriemeistrar. Laget slo Potsdam i tre avgjerande kampar i sluttspelet. Han hadde då vore trenar for klubben i to og eit halvt år, men på grunn av ein kreftdiagnose valde Aleksandersen å trekke seg frå trenarjobben sommaren 2023. Han var då tidenes mest suksessrike trenar i Allianz MTV Stuttgart.

Tore Aleksandersen var hovudtrenar for det norske herrelandslaget frå 2018 til 2023. I desember 2023 vart han utnemnd til æresmedlem i Norges Volleyballforbund.

• volleyball
• seriemeistrar i volleyball
• NM-vinnarar i volleyball

• Norges Volleyballforbund: En reise har tatt slutt
• Frankfurter Allgemeine: Krebskranker Volleyball-Trainer hört auf
• Stuttgarts schoenster sport: Neuer Trainer fuer Allianz MTV Stuttgart
• Stuttgarts schoenster sport: Tore Aleksandersen bleibt Stuttgarter Trainer
• Aftenposten: Fikk kreftdiagnose i februar – nå er han klar for ny trenerjobb i utlandet
• Volleyballforbundet: Europacupfinale for norsk trenerduo
• Romsdals Budstikke: Aukra Volleyballklubb går i oppløsning