Faktaboks

Thorhild Widvey
Fødd
9. januar 1956, Avaldsnes, Rogaland
Thorhild Widvey.
Stortinget.

Thorhild Widvey er tidlegare stortingsrepresentant for Høgre frå Rogaland i 1989–1997, tidlegare olje- og energiminister i regjeringa Bondevik II i 2004–2005 og tidlegare kulturminister i regjeringa Solberg frå oktober 2013 til desember 2015.

Bakgrunn

Thorhild Widvey er fødd i Avaldsnes (no Karmøy) i Rogaland. Ho gjekk på Haugesund gymnas i 1972–1975, Idrætshøjskolen i Århus i 1975–1976 og har eksamenar frå BI. Ho arbeidde som idrettsleiar ved ein HVPU-institusjon på Karmøy i 1976–1982 og i 1986, som prosjektleiar i Karmøy kommune i 1983–1985 og var marknadskonsulent for Rica-hotella i Haugesund i 1987–1989.

Politisk karriere

Widvey har lang erfaring frå både politisk arbeid og styreverv i ulike bedrifter i næringslivet. Widvey var medlem av styret i Karmøy Høgre frå 1980, kommunestyrerepresentant i Karmøy i 1979–1983, medlem av formannskapet i Karmøy i 1983–1989, medlem av styret i Rogaland Høgre i 1985–1989 og medlem av fylkesutvalet i Rogaland i 1987–1989. Sidan 2008 har ho vore medlem av sentralstyret i partiet.

I 1985–1989 var Widvey vararepresentant til Stortinget, og frå 1989 til 1997 var ho vald inn som fast representant for Høgre frå Rogaland. Først sat ho i sosialkomiteen på Stortinget i 1989–1993, deretter i samferdselskomiteen i 1993–1997. Widvey var statssekretær i regjeringa Bondevik II, fyrst for statsråd Svein Ludvigsen i Fiskeridepartementet i 2002–2003 og deretter for statsråd Jan Petersen i Utanriksdepartementet i 2003–2004. Widvey var olje- og energiminister i den andre regjeringa til Bondevik i 2004–2005. Dei neste åra hadde ho mange styreverv, særleg i oljerelaterte næringar.

Frå 2013 til desember 2015 var ho kulturminister i regjeringa Solberg. Som kulturminister arbeidde Widvey mellom anna for meir privat sponsing av kulturlivet, utarbeiding av ein bransjeavtale med unntak frå prislova i staden for ei boklov, endring av mediepolitikken, og ho fekk ansvaret for å følgje opp Oslo sin søknad om å arrangere OL i 2022. 16. desember 2015 fekk ho avskil i nåde.

Andre verv

Widvey har hatt ei lang rekkje tillitsverv og styreverv. Ho var mellom anna medlem og deretter nestleiar av styret i Norges Handicapidrettsforbund (NHIF) i 1983–1987, nestleiar i Norges Reiselivsråd frå 1990, leiar av styret for Hiimsmoenkollektivet frå 1988 og nestleiar i Europabevegelsen frå 1992. Ho var styremedlem i Tromsø 2018, leiar av hovudstyret i Sjømannskirken i 2009–2013, sat i styret i Aker Drilling ASA i 2005–2013 og Bjørge ASA i 2006–2013. Widvey var styremedlem i Stiftelsen Offshore Northern Seas, Haugaland Kraft og Stiftelsen Rogaland Kunnskapspark i 2012–2013.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg