Faktaboks

Stig Sæterbakken
Fødd
4. januar 1966, Lillehammer, Innlandet
Død
25. januar 2012, Lillehammer, Innlandet
Stig Sæterbakken.
Av /Cappelen Damm.
Bokomslag
Stig Sæterbakken. Besøket. Cappelen. Oslo, 2006.
Bokomslag

Stig Sæterbakken var forfattar. Han var ein kompromisslaus og kontroversiell deltakar i den litterære debatten og blei høgt verdsett både som romanforfattar og essayist.

Bakgrunn

Stig Sæterbakken var fødd på Lillehammer i Oppland (no Innlandet). Han gjekk Lillehammer Gymnas (1982–1984). Han byrja på Statens bibliotekhøgskole (seinare Høgskulen i Oslo, no Høgskulen i Oslo og Akershus), men slutta raskt og studerte i staden litteraturvitskap ved Universitetet i Oslo.

Sæterbakken tok sitt eige liv i 2012.

Forfattarskapen

Sæterbakken var 18 år gamal då han debuterte med diktsamlinga Flytende paraplyer i 1984. Etter romandebuten med Incubus i 1991 arbeidde Sæterbakken for det meste som forfattar og omsetjar. I tillegg underviste han i skrivekunst ved Nansenskolen på Lillehammer.

Seinare gav Sæterbakken ut fleire diktsamlingar og romanar, og dessutan forteljingar og essaysamlingar. Det nye testamentet (1993) er ein stor og utfordrande roman, som fekk hard medfart blant norske kritikarar. Den såkalla S-trilogien, med Siamesisk (1997), Selvbeherskelse (1998) og Sauermugg (1999), er meir anerkjend og er blant dei mest særeigne bøkene hans.

I den kritikarroste romanen Besøket (2006) drøftar forfattaren mellom anna kva som skjer når sjølvbiletet blir forstyrra og forholdet til dei næraste må revurderast. Usynlige hender (2007) er ein psykologisk thriller. Ikke forlat meg (2009) er ei mørk skildring av eit ungt sinn i ferd med å gå til grunne både av kjærleikssorg og av øydeleggjande sjalusi. Romanen er fortald baklengs, på denne måten kan lesaren bli betre i stand til å forstå dei moglege årsakene til det tragiske livet til hovudpersonen.

I essaysamlingane til Sæterbakken kjem den prinsipielle tenkinga hans om litteratur og kunst til syne. Essaya hans er stilistisk nyskapande og elegante, og minst like høgt verdsette som romanane. I samlingar som Estetisk salighet (1994), Det onde øye (2001) og Dirty Things (2010) diskuterer han spørsmål om litteratur, etikk og samfunn på ein uredd og engasjert måte. I både essay og romanar ser vi inspirasjonen frå tyskspråklege forfattarar som Peter Handke og Thomas Bernhard og franskspråklege forfattarar som J.M.G. Le Clézio og Louis-Ferdinand Céline.

Omsetjingsarbeidet

Sæterbakken har omsett diktsamlingar av dei slovakiske poetane Ján Ondruš, Ján Buzássy og Ivan Kupec, ei samling noveller av Edgar Allan Poe og to romanar av den svenske forfattaren Nikanor Teratologen.

Anna kulturelt engasjement

Sæterbakken var redaktør for skriftserien Marginal i perioden 1995–1997. Sæterbakken var kunstnarleg leiar for Norsk Litteraturfestival – Sigrid Undset-dagene frå 2006 til oktober 2008. Som kunstnarleg leiar for Norsk Litteraturfestival på Lillehammer inviterte han i 2009 holocaust-fornektaren David Irving til festivalen, og etter oppstyret som invitasjonen førte til, trekte han seg frå jobben. Sæterbakkens innsats som kunstnarleg leiar bidrog til å gjere litteraturfestivalen til ein av dei viktigaste og mest spennande i Noreg.

Utmerkingar

For omsetjinga av Nikanor Teratologens Eldreomsorgen i Øvre Kågedalen (2007) fekk Sæterbakken både Kritikarprisen for beste omsetjing og Bokklubbane sin omsetjarpris i 2007. Han fekk også Osloprisen 2006 for Besøket (2006), og den siste romanen hans, Gjennom natten, fekk både P2-lyttarane sin romanpris 2011 og Ungdommens kritikarpris 2011 etter at Sæterbakken var død. I 2012 blei Stig Sæterbakkens minnepris oppretta, og den blir delt ut til unge, modige litterære talent. Dei første åra gjekk prisen til nynorskforfattarane Mette Karlsvik (2012) og Jan Roar Leikvoll (2013).

Bibliografi

  • Ikke noe av dette handler om meg (Sjølvbiografiske notat, Cappelen Damm, 2016. Kom ut posthumt)
  • Umuligheten av å leve (Essay, Cappelen Damm, 2011)
  • Det fryktinngytende (Essays, Cappelen Damm, 2011)
  • Gjennom natten (Roman, Cappelen Damm, 2011)
  • Dirty Things (Essays, Cappelen Damm, 2010)
  • Ikke forlat meg (Roman, Cappelen Damm, 2009)
  • Ja.Nei.Ja (Essay, Flamme, 2009)
  • Usynlige hender (Roman, Cappelen, 2007)
  • Besøket (Roman, Cappelen, 2006)
  • Kapital (Roman, Cappelen, 2003)
  • Det onde øye (Essays, Cappelen, 2001)
  • Sauermugg (Roman, Cappelen, 1999)
  • Selvbeherskelse (Roman, Cappelen, 1998)
  • Siamesisk (Roman, Cappelen, 1997)
  • Estetisk salighet (Essays, Cappelen, 1994)
  • Det nye testamentet (Roman, Cappelen, 1993)
  • Incubus (Roman, Cappelen, 1991)
  • Vandrebok (Prosa, Cappelen, 1988)
  • Sverdet ble til et barn (Dikt, Cappelen, 1986)
  • Flytende paraplyer (Dikt, Cappelen, 1984)

Les meir i Store norske leksikon

Eksterne lenker

Litteratur

  • Audun Lindholm (red.): Alt menneskelig. En bok om Stig Sæterbakken. Oslo 2016

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg