Stig Nilsson (forfattar og musikar)

Stig Nilsson er fødd i Kristiansund i Møre og Romsdal. Han har arbeidd som journalistlærling i 1972 og seinare som journalist i Tidens Krav, Aura Avis, Sunnmøre Arbeideravis, Fredrikstad Blad og Driva. Han var informasjonsleiar i Arbeidarpartiet i 1987–1989, programsekretær i NRK i 1992–1994 og 1995–1998, og høgskulelærar i journalistikk ved Høgskulen i Volda i 2000–2008. Han skriv både nynorsk og bokmål.

Nilsson har gitt ut tre visebøker (1977–1979), barneboka Fanget i mareberget (1981), læreboka Avis frå A til Å (2003) og Belle 'kje å hæl mæ, ordliste over kristiansundsdialekten (2010). Han har òg skrive biografiane Prots – trollmann med kor (2006) om Per Oddvar Hildre, Frode Alnæs – mannen som er en gitar (2009) og Sissel (2010) om Sissel Kyrkjebø.

Nilsson var òg ansvarleg redaktør for øvingsavisa Næravisa ved Høgskulen i Volda i fleire år. Av dramatiske arbeid har han mellom anna skrive librettoen til musikkspelet Lady Arbuthnott – Frua på Elverhøi (1996–2011) og byoperaen Donna Bacalao (2008–2011) i Kristiansund.

Han var vokalist og gitarist i gruppa Mad Movies tidleg i 1970-åra og har gitt ut tre soloplater. Han har skrive om lag 300 songtekstar, mellom anna for Jørn Hoel, Frode Alnæs og Sissel Kyrkjebø.

Nilsson fekk Prøysenprisen for debutalbumet (1976), NOPAs pris for Årets verk (1994), Nordeas kulturpris (2010) og Fylkeskulturprisen for Møre og Romsdal (2010).

• vise
• biografi
• Prøysenprisen
• dialekt