Faktaboks

Sondre Bratland
Fødd
11. september 1938, Vinje, Telemark
Sondre Bratland.
Av /Pressebilete frå heimstaden til Sondre Bratland.
Sondre Bratland. Fotograf: Kjell Bitustøyl, gjengitt med tillatelse.
.
Lisens: Avgrensa gjenbruk

Sondre Bratland er ein norsk folkesongar (kvedar) frå Vinje, som syng i tradisjon etter folkesongarar hovudsakleg i øvre Telemark og Setesdal. Religiøse folketonar (salmetonar) er spesialområdet hans, men elles spenner uttrykket hans frå norsk kvedartradisjon til country.

Bakgrunn

Sondre Bratland er fødd på Edland i Vinje i Telemark. Han er utdanna lærar, med med fordjuping i faga norsk og musikk, og har mange års fartstid som lærar i heimkommunen. Bratland har vore avdelingsleiar i fem år og dosent II ved folkekulturstudiet ved noverande Universitetet i Søraust-Noreg i Rauland. Frå 1997 har han vore statsstipendiat og utøvar på heiltid. Han har verka som songpedagog og er mellom anna læremeisteren til Arve Moen Bergset.

Musikkarrieren og kulturarbeidet

Bratland har gjennom ein mannsalder vore den sentrale mannlege folkesongaren i Noreg. Han debuterte med utgivinga Pilegrimens Sangbog i 1982. Bratland har vore ein grensesprenger mellom ulike musikksjangrar, og han har såleis fått formidla norsk kvedartradisjon til eit breiare publikum. Dette har han òg gjort gjennom samarbeid med ei lang rekkje musikarar som mellom anna Iver Kleive, Knut Reiersrud, Annbjørg Lien og Oslo Kammerkor.

Som utøvar har han ei eineståande formidlingsevne av både tekstinnhaldet og musikken til songane sine. Bratland har vore døropnar for yngre utøvarar og har gjort vokal folkemusikk omtykt i breie lag. Han har spesialisert seg i religiøs folkemusikk. Han har gitt ut 13 soloplatar. Han har skrive fleire eigne songtekstar til irske og nordiske folkemoldiar.

Gjennom innsamling, dokumentasjon og bruk forvaltar Bratland levande tradisjonsmusikk. Han har blant anna samla religiøse folketonar i Agder, Rogaland og Telemark. Viktige kjelder har vore mora Sigrid Bratland og tanta Brita Bratland, Tallak Hoslemo (1895–1982) frå Bykle og Ragnar Vigdal (1913–1991) frå Luster. I seinare år har han tonesett tekstar av mellom anna Olav H. Hauge, Olav Mostøl og Tarjei Vesaas, og omsett tekstar av Hank Williams.

Utmerkingar

Bratland har fått ei rekkje prisar, mellom anna Spellemannprisen i 1982 for debutplata, Kulturprisen til Vinje kommune i 1986, Telemark fylkes kulturpris i 2003 og Storegutprisen for god og levande bruk av nynorsk i 2014. I 2019 vart han utnemnd til kommandør av St. Olavs Orden.

Album

  • Pilegrimens Sangbog (1982, Spellemannprisen)
  • Den blå gleda (1984)
  • Mysteriet (1990)
  • Rosa frå Betlehem (1992 – solgt i over 60 000 eksemplarer)
  • Atterklang (1996)
  • Kvilestein (1999)
  • Draumkvedet (2002)
  • Syng meg heim (2005)
  • Dialogue – med Javed Bashir (2006, Folkelarmprisen)
  • Det er den draumen – tekstar av Olav H Hauge (2008)
  • Alle vegne – med Annbjørg Lien (2010)
  • Jol i mi song (2011)
  • Gje meg handa di – utvalde viser & salmer (2015)

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg