Faktaboks

Sigbjørn Johnsen
Fødd
1. oktober 1950, Lillehammer
Verke
Politiker og fylkesmann
Familie

Foreldre: Kommunearbeider Jens Johnsen (1928–99) og kjøkkenassistent Arnlaug Pettersen (1927–).

Gift 1987 med lege Helle Birgit Laier (31.8.1958–), datter av kjøpmann Karl Aage Laier, Danmark (1932–98) og Gudrun Laier (1931–).

Sigbjørn Johnsen
Sigbjørn Johnsen har vore finansminister i Noreg to gonger. Foto frå 2009, frå hans siste finansministerperiode.
Av .
Lisens: CC BY 2.0

Sigbjørn Johnsen er ein norsk politikar for Arbeidarpartiet. Han har vore finansminister to gonger – i Brundtland-regjeringa fra 1990 til 1996 og i Stoltenberg-regjeringa frå 2009 til 2013. Han var fylkesmann i Hedmark frå 1997 til 2017.

Bakgrunn

Johnsen er fødd på Lillehammer, men voks opp på Stavsjø i det som i dag er Ringsaker kommune. Han var bankkasserar i 1970–1971 og undervisningsleiar og rekneskapsførar i AOF, Hedmark, frå 1971. Han var nestleiar i Likestillingsrådet frå 1976 til 1983.

Johnsen var nestformann i AUF i 1975–1976. Han vart vararepresentant til Stortinget i perioden 1973–1977, og møtte fast då Odvar Nordli vart statsminister i 1976. Han var deretter vald stortingsrepresentant for Hedmark i åra 1977–1997.

Finansminister og fylkesmann

Sigbjørn Johnsen var medlem av finanskomiteen på Stortinget frå 1980 til 1990 og nestleiar frå 1986. Frå 1990 til 1996 var han ein markert finansminister i Gro Harlem Brundtlands regjering. Frå 1997 var han fylkesmann i Hedmark. Til overraskinga til mange gjekk Sigbjørn Johnsen igjen inn i politikken og var på ny finansminister i den rød-grønne regjeringa frå 2009 til 2013. Ingen har vore finansminister her i landet så lenge som Johnsen.

Mange store utfordringar møtte han i den første perioden som finansminister, og den største var utan tvil bankkrisa i 1991, då dei største forretningsbankane var nær ved å gå konkurs, men vart berga gjennom etableringa av Statens Banksikringsfond og Statens Bankinvesteringsfond. Johnsen var òg sentral i å få på plass det store forliket om skattereforma i 1992. Som fylkesmann sat han som leiar for komiteen som greidde ut pensjonsreforma, og han spela ei sentral rolle for å få denne reforma gjennomført.

Som fylkesmann var han mellom anna medlem av Noregs Banks hovudstyre frå 1999 til 2004 og leiar i ei rekkje offentlege utval, blant dei Valglovutvalget i perioden 1997–2000 og Pensjonskommisjonen i perioden 2000–2004.

Dialekt

I alle sine år som politikar har Sigbjørn Johnsen halde fast på bakgrunnen sin frå Hedmark. Han er kjend for å bruke sin karakteristiske hedmarksdialekt i skrift og tale, og har gjort dialekten til eit varemerke. Det har vore med på å gjere han til ein folkekjær politikar. Han fekk Dialektprisen i 1993.

Johnsen er glad i lyrikk, særleg dikta til dei to Hedmarks-diktarane Hans Børli og Rolf Jacobsen.

Utgivingar

Sigbjørn Johnsen gav ut i 2004 memoarboka Saligheta heme. I 2010 kom Æille åra innaførr.

Les meir i Store norske leksikon

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg