Ragnhild Furebotten

Ragnhild Furebotten er fødd i Saltdal i Nordland. Då ho var 16 år gamal, starta ho på den formelle musikalske utdanninga si ved Kongsbakken videregående skole i Tromsø (1995–1998). Seinare har ho gått på Høgskolen i Telemark (no Høgskulen i Søraust-Noreg) (1998–2000) og Noregs musikkhøgskole (2000–2004).

For å bryte med dei tradisjonelle premissane i den klassiske musikktradisjonen ville Furebotten finne sine eigne vegar som felespelar. Ho har vore med på fleire prosjekt, både som soloartist og saman med andre. I 2000 var Furebotten med og etablerte folkemusikkgruppa Majorstuen saman med fem andre unge folkemusikarar frå ulike delar av landet. I 2003 fekk dei Spellemannprisen for debutalbumet Majorstuen. I 2007 var dei den første norske folkemusikkgruppa som fekk vere med på verdsmusikkmessa WOMEX. Furebotten slutta i gruppa i 2007.

Saman med nordnorske folkemusikarar etablerte Furebotten gruppa Hekla Stålstrenga i 2005. Same året var ho òg ein av initiativtakarane til folkemusikkgruppa Fotefar.

Endelig vals (2007) var Ragnhild Furebotten sitt første soloprosjekt. For soloprosjektet Never on a Sunday (2011) fekk ho Spellemannprisen i klassen folkemusikk/tradisjonsmusikk. Furebotten har òg gjeve ut soloalbumet Klopper (2019). Samspelet mellom felespelar Furebotten og seks av dei beste jazzblåsarane i landet har sett nordnorske slåttar og folkemusikktradisjonar inn i ein uvanleg kontekst.

• folkemusikk
• Hekla Stålstrenga
• Spellemannprisen