Per Arne Olsen

Per Arne Olsen var fødd i Tønsberg. Han gjekk på Tønsberg Handelsgymnas i 1977—1980. Seinare tok han kurs ved Forsvarets høgskole. Olsen arbeidde som bankfunksjonær i Nøtterø Sparebank i 1980—1981 og var salssekretær i Lindfo AS i 1981—1986. Frå 2013 til 2016 var han seniorrådgivar i Gambit Hill+Knowlton.

Olsen var generalsekretær i Framstegspartiets Ungdom i 1986—1989. Mellom 1989 og 1997 var han kontorsjef ved hovudkontoret til Frp og fungerande generalsekretær i partiet i 1992—1993. Han var nestleiar i Frp i 2005—2013.

Olsen var medlem av Tønsberg kommunestyre for Frp mellom 1983 og 2009, først som bystyrerepresentant, deretter i formannskapet i 1987—2003. I 2003—2009 var han ordførar i Tønsberg. Olsen var sekretariatsleiar i stortingsgruppa til partiet i 1997—2003.

Han var vararepresentant til Stortinget i 2001—2009 og vart innvald som stortingsrepresentant for Framstegspartiet frå Vestfold i perioden 2009—2013. Han var i denne perioden medlem av helse- og omsorgskomiteen på Stortinget. I 2016—2018 var han fylkesmann i Vestfold og sidan 2019 statsforvaltar i Vestfold og Telemark.

Olsen hadde fleire administrative verv og tillitsverv, mellom anna som medlem av styret for Folketrygdfondet i 1992—2009, varamedlem i Kringkastingsrådet i 1998—2009, medlem av styret for KS (Kommunenes Sentralforbund) i 2008—2009 og medlem av styret i Vinmonopolet frå 2016.

• Framstegspartiet
• stortingsrepresentant
• ordførar
• fylkesmann

• Stortinget: Per Arne Olsen