Ole Kopreitan

Faktaboks

Ole Kopreitan

Ole Andreas Kopreitan

Født
19. september 1937, Stavanger, Rogaland
Død
23. januar 2011, Eidsvoll, Viken

Bilete frå Norsk biografisk leksikon

Ole Kopreitan
Av /NTB Scanpix ※.

Ole Kopreitan frå Nei til atomvåpen med stand på Karl Johans gate i Oslo 13. juli 1989. Kopreitan var eit velkjent innslag i bybiletet med barnevogna si med buttons, merke og litteratur mot atomvåpen. Her har han har fått ny barnevogn av organisasjonen Bestemødre for fred / Bestemødre på Stortingsplassen, representert ved Olaug Stixrud (f.v.), Oddlaug S. Andersen og Borghild Solly.

Ole Kopreitan
Av /NTB scanpix.

Artikkelstart

Ole Kopreitan var politisk aktivist. Han gjekk ut av Sosialistisk Folkeparti i 1969, vart i 1971 organisator i folkerørsla mot EF og var i 30 år dagleg leiar for Nei til atomvåpen.

Bakgrunn

Ole Andreas Kopreitan var fødd i Stavanger i Rogaland og døydde på Eidsvoll i Akershus (no Viken). Han voks opp på Hitra og Eidsvoll, tok examen artium ved Eidsvoll landsgymnas og lærareksamen ved Sagene lærarskule.

Politikk og aktivisme

I 1963–1965 var Kopreitan leiar for Sosialistisk Ungdomsforbund, den nyskipa ungdomsorganisasjonen til Sosialistisk Folkeparti (SF), og 1967–1969 var han partisekretær i SF. Då SF vart delt i 1969, var han mellom dei som marsjerte ut av landsmøtet, men han heldt avstand til ml-rørsla.

Den største innsatsen gjorde han som aktivist og organisator i grasrotaksjonar og folkerørsler. Frå hausten 1970 arbeidde han i Folkebevegelsen mot norsk medlemskap i EEC, først som friviljug på hovudkontoret, frå 1971 som fast tilsett. Frå 1981 til han døydde, var han dagleg leiar for Nei til atomvåpen.

I tidlege år og før han byrja i Nei til atomvåpen, var han aktiv i mange andre aksjonar og tiltak, mellom anna mot apartheid-regimet i Sør-Afrika, mot Vietnamkrigen, mot kjernekraft, for miljøvern. I seinare år var han ofte å sjå på Karl Johans gate i Oslo, der han spreidde aksjonsaviser, brosjyrar og jakkemerke frå ei ombygd barnevogn. Ei av barnevognene er utstilt i Wergelands Hus på Eidsvoll 1814.

Utmerkingar

I 2002 vart Kopreitan heidra med Zola-prisen, utdelt av Foreningen til fremme av sivilt mot.

Les meir i Store norske leksikon

Litteratur

  • Erik Alfsen: 30 år med NTA. Nei til atomvåpen. Oslo 2009
  • Erik M. Alfsen mfl. (red): Begynnelsen til slutten på atomvåpnene? Oslo 1997
  • Jo Bech-Karlsen (red): De Ulydige. Kampskrift til Ole Kopreitan. Oslo 1987
  • Tor Bjørklund: Mot Strømmen. Kampen mot EF 1961–1972. Oslo 1982
  • Berge Furre: Vårt hundreår. Norsk historie 1905–1990. Oslo 1991
  • Finn Gustavsen: Kortene på bordet. Oslo 1979
  • Knut Kjeldstadli: «Sosialistisk Folkeparti». PaxLeksikon, bd. 6. Oslo 1981
  • Knut I. Tønsberg (red.) : Det er for sent å være pessimist nå. Oslo 2007

Kommentarer

Kommentaren din publiseres her. Fagansvarlig eller redaktør svarer når de kan.

Du må være logget inn for å kommentere.

eller registrer deg