Ogna er ein tettstad i Hå kommune i Rogaland. Tettstaden er ifølgje SSBs definisjon 0,26 km², og har 374 innbyggjarar (2023).
Ogna ligg ved munninga av Ognaelva mellom Brusand og Sirevåg, i overgangen mellom Jæren og Dalane. Det er store sandstrekningar langs kysten ved Ogna stasjon.
Både Jærbanen og fylkesveg 44 passerer gjennom Ogna. Nord for tettstaden er det gjort viktige forhistoriske funn, mellom anna restar av nesten 4000 år gamle stolpehus. Den Vestlandske Hovedvei er gjenskapt som turveg frå Ogna til Hellvik (Eigersund). Ogna har tiltrekt seg kunstnarar i over 100 år. Blant dei første var Kitty Kielland, og maleriet hennar «Fra Ogna» skaffa henne den første offentlege anerkjenninga, i Paris. Seinare kom blant andre Eilif Peterssen, Fritz Thaulow og Harriet Backer. Ogna er framleis ein populær stad for kunstnarar, med fleire atelier og utstillingar.
Namnet er opphavleg eit elvenamn og kjem truleg av norrønt ógn, 'skrekk, redsel'; kan sikte til straum, isløysing, flaum eller liknande i elva.
Kommentarar
Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.
Du må være logga inn for å kommentere.