Faktaboks

Norges Røde Kors
Organisasjonstype
Forening/lag/innretning
Forretningsadresse
Oslo
Stifta
22.09.1865
Dagleg leiar
Anne Bergh
Styreleiar
Siri Beate Hatlen
Røde Kors
Røde Kors

Norges Røde Kors er ein frivillig, humanitær hjelpeorganisasjon som har til føremål å driva humanitært hjelpearbeid i inn- og utland utan omsyn til nasjonalitet, etnisitet, truvedkjenning, samfunnsklasse eller politisk overtyding. Norges Røde Kors er ein av dei eldste nasjonale Røde Kors-foreiningane i verda.

Føremål

Norges Røde Kors har til føremål å driva humanitært hjelpearbeid. Opphaveleg skulle foreininga yta hjelp til såra i krig. Etter kvart er hovudvekta av arbeidet flytta over til sosiale oppgåver som omsorgsarbeid for unge og eldre, sjuke, funksjonshemma og einsame, besøksteneste, fjellredning, førebyggjande arbeid mot hiv-smitte og kontakttelefon for barn og unge.

Organisering

Norges Røde Kors er ein landsomfattande organisasjon med cirka 160 000 medlemmer (2023). Organisasjonen har sekretariat i Oslo og gir ut medlemsbladet Røde Kors Magasinet og nødhjelpsmagasinet Hjelp.

Innanlandsverksemda er organisert under tre landsråd, Røde Kors Omsorg, Røde Kors Hjelpekorps og Røde Kors Ungdom. I tillegg kjem tre feriesenter, Eidene (Tjøme), Haraldvigen (Kristiansand) og Merket (Nord-Aurdal), som mellom anna tilbyr ferieopphald til personar med funksjonshemming.

Norges Røde Kors har distriktsforeiningar i alle fylka i landet og 372 lokalforeiningar og sjølvstendige spesialavdelingar. Totalt 42 000 frivillige er til kvar tid parat til innsats i Røde Kors-regi. 10 000 av dei er besøksvenner som stiller opp for unge og eldre som har behov for samvær og samtale. 6 000 medlemmer er aktive i hjelpekorps. 226 av kommunane i landet har samarbeidsavtale med Røde Kors om beredskap.

Norges Røde Kors driv eit omfattande nød- og katastrofearbeid og hjelper til med akutthjelp ved krig, konfliktar og naturkatastrofar.

Dei viktigaste inntektskjeldene til organisasjonen er løyvingar frå staten, spelemidlar, innsamla midlar og finans- og investeringsinntekter.

Røde Kors Ungdom

.
Lisens: Avgrensa gjenbruk

Røde Kors Ungdom er Norges Røde Kors' ungdomsorganisasjon og omfattar medlemmer som er mellom 13 og 30 år. Røde Kors Ungdom er engasjert i arbeid for å motverka urettferd, intoleranse og maktmisbruk i inn- og utland. Organisasjonen driv mellom anna med arbeid mot utanforskap og einsemd blant unge, støttetiltak retta mot barn og unge i asylmottak, ung psykisk helse og internasjonal utveksling.

Norges Røde Kors Besøksteneste

Norges Røde Kors Besøksteneste organiserer besøk til menneske som ønskjer støtte og oppmuntring i kvardagen. Tilbodet kan ha litt ulik innretning rundt om i landet; nokre stader er besøksvennene primært på besøk i private heimar, andre stader driv dei mest aktivitet på institusjonar (for eksempel sjukeheimar). For å bli besøksvenn må ein vera 18 år, gå gjennom eit kurs for besøksvenner, ta tausheitsløfte og utføra tenester utan å få betaling.

Røde Kors Hjelpekorps

Hjelpekorpset er Noregs største frivillige beredskapsorganisasjon. Om lag 6 000 aktive medlemmer i cirka 320 hjelpekorps utfører hjelpearbeid ved ulykker og katastrofar. I tillegg til generell beredskap inngår friluftsliv og førstehjelp for ungdom, ettersøking etter sakna personar, sanitets-/førstehjelpsvakter og ambulanseteneste i verksemda.

Hjelpekorpsa utdannar medlemmene, byggjer opp og sikrar forsvarleg beredskap, og dessutan spreier kjennskap til førstehjelp i det store og heile.

Samarbeid med andre

Noregs Røde Kors blei i 1907 autorisert av Forsvarsdepartementet som frivillig hjelpeforeining for Forsvarets sanitet i tilfelle krig.

Røde Kors samarbeider i dag med Sivilforsvaret, redningstenesta, politiet og helsetenesta om støtte med personell, materiell og transportmiddel under katastrofar, store ulykker og ved beredskapssituasjonar og krig.

Utanlandsarbeid

Den største delen av utanlandsarbeidet er konsentrert om nødhjelp, både i krigs- og konfliktsituasjonar og ved naturkatastrofar, i samarbeid med Det internasjonale forbundet av Røde Kors- og Røde Halvmåne-foreiningar (IFRC) og Den internasjonale Røde Kors-komiteen (ICRC). Også oppsporing og søk etter folk som er sakna som følgje av krig og konfliktar, er ein del av oppgåvene. Noregs Røde Kors driv også utviklingshjelp i ei rekkje land.

Les meir i Store norske leksikon

Eksterne lenker

Litteratur

  • Schilling, Dag Fr. Chr. & Kåre Ottersen: Barmhjertighetsfronten : Norges røde kors under krigen 1940–1945, 1995.
  • Sæter, Martin: Over alle grenser : Norges røde kors 100 år, 1965.

Faktaboks

Norges Røde Kors
Sektorkode
7000 Ideelle organisasjoner
Næringskode(r)
88.995 Sosiale velferdsorganisasjoner

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg