Faktaboks

Nils Utsi

Nils Reidar Utsi

Fødd
22. juli 1943
Død
1. januar 2019
Nils Utsi
Nils Utsi under innspelinga av Nils Gaup-filmen Historien om Kautokeino 1852 i 2006.
Nils Utsi
Av /NTB Scanpix.
TV-serien «Ante»
Nils Utsi saman med Sverre Porsanger, som spela tittelrolla i TV-serien Ante (1976).
TV-serien «Ante»
Av /NTB.

Nils Utsi er ein norsk-samisk skodespelar og instruktør. Han er særleg kjend for å spele samiske roller i norske filmar og teaterframsyningar.

Nils Utsi blei fødd i Tana. Han blei teken opp ved Teaterhøgskolen i Oslo i 1964 og var den første studenten der med samisk bakgrunn. Etter å ha utdanna seg til skodespelar blei han tilsett ved Den Nationale Scene i Bergen i 1968. Her spela han blant anna Vladimir i Mens vi venter på Godot (1969).

I 1971 var han med på å opprette Hålogaland Teater, det første profesjonelle teateret i Nord-Noreg og det første regionteateret i Noreg. Det første tiåret var Utsi blant dei sentrale drivkreftene ved teatret, og han tok del i alle produksjonane den første tida. Også seinare gjesta han Hålogaland Teater i fleire roller, mellom anna i tittelrolla i stykket Petter Dass (1984), og i ei av rollene i Benoni og Rosa (2005).

Utsi hadde ei rekkje roller i filmar og TV-produksjonar. Han blei landskjend gjennom serien om sameguten Ante, send på NRK i 1976 og 1977, der han spela far til Ante og var medinstruktør i serien. Han var med i dramafilmen La elva leve! (1980) om Alta-aksjonen i 1979–1980. I den samiske filmen Veiviseren (1987) hadde han ei sentral rolle. Filmen blei nominert til Oscar-prisen for beste utanlandske film. Han spela òg mellom anna i filmane Kautokeino-opprøret (2008) og Jernanger (2009). I 2012 hadde han ei viktig rolle i ungdomsserien «Hjerterått», som blei vist i NRK. Han har òg spela i fleire kortfilmar.

Nils Utsi hadde hovudrolla i ein samisk versjon av Ludvig Holbergs Jeppe på Bjerget ved Beaivváš Sámi Teáhter (no Beaivváš Sámi Našunálateáhter) i Kautokeino i 1997. Han var instruktør for stykket Stein i lomma (Stones in his Pockets) ved det same teateret i 2004.

Utsi var dessutan ein aktiv teateroversettar, og han dramatiserte det samiske sagnet Gutten og gullfuglen, som har vore sett opp på fleire teater (første gong ved Hålogaland Teater i 1972). Han blei tildelt Finnmark fylkes kulturpris i 2016.

Nils Utsi var far til Maria Utsi, direktør for Festspillene i Nord-Norge.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg