Faktaboks

Marte Mjøs Persen
Fødd
24. april 1975, Bergen, Vestland
Marte Mjøs Persen
Arbeiderpartiet.
Lisens: CC BY ND 2.0

Marte Mjøs Persen er ein norsk politikar for Arbeidarpartiet som i perioden 2021–2023 var statsråd i regjeringa Støre. Ho var olje- og energiminister frå 2021 til 2022 og arbeids- og inkluderingsminister 2022–2023. Ho representerer HordalandStortinget sidan 2021. Frå 2015 til 2021 var ho ordførar i Bergen.

Politisk karriere

Marte Mjøs Persen var tidlegare medlem og tillitsvald i Raud Valallianse (RV), og var nestleiar i RV frå 2003 til 2007. I 2007 melde ho seg ut av partiet då RV gjekk saman med AKP og danna Raudt, og melde seg deretter inn i Arbeidarpartiet.

Persen var medlem av Bergen bystyre 2003–2023, først som representant for RV fram til 2007, deretter for Arbeidarpartiet frå 2008. Ho arbeidde som fylkessekretær i Nei til EU i Hordaland til 2008 og som organisasjonssekretær i Human-Etisk Forbund i Hordaland i 2008–2011. Sidan 2011 har Mjøs Persen vore heiltidspolitikar, som leiar for helse- og sosialkomiteen i Bergen og var frå 2015 til 2021 ordførar for Arbeidarpartiet i Bergen.

Marte Mjøs Persen var leiar av Arbeidarpartiet i Bergen og medlem av sentralstyret i Arbeidarpartiet frå 2011 til 2015, og vart igjen valt inn i sentralstyret i 2019. Mjøs Persen er òg leiar av Vestland Arbeiderparti frå 2019. Etter det gode valet til Arbeidarpartiet i Bergen i 2015 tok Mjøs Persen over som ordførar i byen etter Høgres Trude Drevland. Ved kommunevalet i 2019 vart Arbeidarpartiet nesten halverte og gjekk tilbake frå 37,9 prosent til berre 19,8 prosent. Partiet beheldt likevel både byrådsmakta og posisjonen som ordførar, og Persen vart attvald som ordførar.

Mjøs Persen vart vald inn på Stortinget for Arbeidarpartiet frå Hordaland for perioden 2021-2025. Ho vart olje- og energiminister i regjeringa Støre 2021 og overtok som arbeids- og inkluderingsminister då Hadia Tajik trakk seg i 2022. Ho vart skifta ut ved regjeringsomdanninga hausten 2023.

Marte Mjøs Persen har arbeida aktivt for å avkriminalisere kjøp og bruk av mindre mengder narkotika. Ho tilhøyrde mindretalet på Arbeidarpartiet sitt landsmøte våren 2021 som ønskte ei slik endring i narkotikapolitikken.

Andre verv

Mjøs Persen har vore aktiv i fagforeininga Handel og Kontor og i LO. Ho har vore styremedlem i Naturvernforbundet i Hordaland og i CISV Norge.

Bakgrunn

Mjøs Persen har ein bachelorgrad i kultur- og samfunnsvitskap (litteraturvitskap og sosiologi) frå Universitetet i Bergen.

Les meir i Store norske leksikon

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg