Mari Aase Hole

Mari Aase Hole byrja å spele volleyball i Osloklubben Koll. Ho gjorde sakene sine godt allereie som junior, og fekk tidleg vere med og trene med det sterke seniorlaget til klubben. Hole gjekk i andreklasse på vidaregåande då ho i 2007 starta sin første NM-finale for seniorar. Det enda med hennar første cupgull i Noreg.

Hole flytta til USA for å satse på volleyball så snart ho var ferdig med den vidaregåande skulen. Ho spelte først to sesongar for UCLA Bruins, før ho bytte klubb og spelte dei to neste sesongane for Ohio State. Der vart ho kåra til vekas nasjonale spelar, ho fekk fleire ligaprisar og ho vart teken ut på All Americans.

Etter fire år med collegevolleyball i USA valde Hole å satse vidare på profesjonell volleyball i Europa. Ho fekk først kontrakt med franske Volley Istres, der ho vart toppscorer og kåra til beste angriper. Så gjekk vegen til Bezier, ein annan fransk eliteklubb, der ho mellom anna fekk spele europacup.

I 2016 skreiv Hole kontrakt med Allianz MTV Stuttgart i Tyskland, men ho vart tidleg skadd og måtte gjennom to operasjonar i den eine skuldra. Etter éin sesong i Bundesliga, trente ho seg opp og spelte ein sesong for Randaberg, før ho valde å returnere til franske Bezier. Der vart ho både serie- og cupmeister i sesongen 2017–2018.

• Idrettslaget Koll (2006–2009 og 2018–2021)
• UCLA Bruins, USA (2009–2011)
• Ohio State, USA (2011–2012)
• Istres Provence Volley, Frankrike (2013–2014)
• Bezier Volley, Frankrike (2014–2015 og 2017–2018)
• Allianz MTV Stuttgart, Tyskland (2015–2016)
• Randaberg (2016–2017)

• Gull i fransk serie og cup (2018)
• Sølv i tysk Bundesliga og cup (2016)
• Fire seriemeisterskap i Norge (2007, 2008, 2009 og 2020)
• Norsk cupmeister tre gongar (2007, 2008 og 2009)

• volleyball
• Idrettslaget Koll
• seriemeistrar i volleyball
• noregsmeistrar i volleyball

• volleybox.net: Mari Aase Hole