Lavik – Store norske leksikon

Lavik er eit sokn i Høyanger kommune i Ytre Sogn i Vestland fylke. Soknet ligg på båe sider av Sognefjorden.

Faktaboks

Etymologi: norrønt (h)lað, lade, laste

Lavik var tidlegare eigen kommune som omfatta heile den noverande Høyanger kommune. I 1858 vart kommunen delt ved utskiljing av Klævold, som i 1891 endra namn til Kyrkjebø. I 1861 vart Brekke kommune lagt til, og den nye kommunen fekk namnet Lavik og Brekke. Brekke vart i 1905 igjen eigen kommune, og Lavik hadde deretter uendra grenser til 1964, då han vart slått saman med Kyrkjebø og delar av Vik til den nye kommunen Høyanger; 220 kvadratkilometer ved samanslåinga.

Kultur og samferdsle

Lavik kyrkje er ei åttekanta kyrkje i tre frå 1865 på nordsida av Sognefjorden; arkitekt Christian H. Grosch.

Ved Lavik kyrkje ligg Lavik ferjestad med band til Oppedal i Gulen på sørsida av fjorden (E 39). På strekninga Lavik-Oppedal vart den første større bilferja i verda med 100 prosent batteridrift sett i rute i 2015.

Namnet

Namnet kjem av norrønt Lamvikum (dativ fleirtal), og kan som ved liknande namn ha samanheng med norrønt (h)lað, 'lade, laste'.

Kart

Lavik

Av Store norske leksikon/Statens kartverk.

Lisens: NLOD (Norsk lisens for offentlige data)

Les meir i Store norske leksikon

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

Fagansvarleg for Høyanger

Svein Askheim