Knut Hamre

Faktaboks

Knut Hamre
Født
3. mars 1952, Granvin
Knut Hamre. Fotograf: Kjell Bitustøyl, gjengitt med tillatelse.
.
Lisens: Begrenset gjenbruk

Artikkelstart

Knut Hamre er ein norsk hardingfelespelemann frå Granvin i Hardanger. Han byrja tidleg å lære hardingfelespel av faren Knut J. Hamre. Seinare blei Anders Kjerland og Håvard Kvandal dei viktigaste læremeistarane. Hamre har vunne Landskappleiken heile sju gonger og har deltatt i ei rad samarbeidsprosjekt der poesi, teater og andre musikksjangrar har vore representerte. Han har gjort seg sterkt gjeldande som lærar i hardingfele i Hardanger sidan 1985 og har rekruttert ei rekkje framståande felespelarar: Frank Rolland, Åse Teigland, Heidrun Opedal, Benedicte Maurseth, Anlaug Børsheim, Alexander Røynstrand, Lajla Renate Buer Storli. Hamre har halde konsertar og kurs og turnert mykje i både inn- og utland.

Saman med Hallvard T. Bjørgum og Bjarne Herrefoss fekk Hamre Spellemannprisen for 1998 for CD-en Toneflaum i klassa for folkemusikk. I 2014 vann han Folkelarmprisen i klassen for solospel for albumet Spelarhola saman med Alexander Aga Røynstrand og Åse Teigland. Hamre har gjeve ut fleire soloalbum, dei tidlegaste er Fargespel (1994) og Ferd (2010). I 2018 kom den viktige og omfattande utgjevinga Slåttar frå Granvin, som besto av heile fire CD-ar og ei bok. For denne utgjevinga fekk Hamre Folkelarmprisen i klassen for dokumentasjon. Eitt år seinare ga han ut albumet Slåttar etter Anders Bonde (2019).

Hamre har òg deltatt på en rekkje andre plateutgjevingar, til dømes Nøringen (1980, med Leif Rygg), Trio i ein fjord (1993, med Reidun Horvei og Geir Botnen), Håstabøslåttar (2000) og Trio Hardanger – i Halldors ånd (2003), dei to sistnemnde saman med Åse Teigland og Frank Rolland, dei tre kallar seg Trio Hardanger.

Eit resultat av Hamre sin kontakt med utlandet er konsert- og plateprosjektet Å (1999), der Hamre samarbeider med dei amerikanske jazzmusikarane Steve Tibbetts og Marc Anderson.

I 2006 kom CD-en Rosa i Botnen, eit pionerprosjekt der dei eldre hardingfelene i Hardanger blei tatt i bruk etter inspirasjon mellom anna frå den aukande interessa for tidlegmusikk. Her spela Hamre i lag med felespelarane Benedicte Maurseth og Nils Økland og organisten Sigbjørn Apeland. Dette prosjektet fekk ein oppfylgjar i konsert- og plateprosjektet Anima (2012) der Hamre samarbeider med Benedicte Maurseth, Nils Økland og dei to tidlegmusikarane Philippe Pierlot, gambespelar frå Belgia, og Elisabeth Seitz, hakkebrettspelar frå Tyskland.

Hamre har og gjeve ut ein CD i lag med folkesongar og hardingfelespelar Turid Spildo Nedrum, Eg ser deg (2011). Saman med forfattaren Jon Fosse har Hamre i seinare tid opptredd på musikkfestivalar og litteraturfestivalar. Hausten 2013 blei Hamre engasjert som ansvarleg lærar i Master Class på hardingfele i regi av Hardanger og Voss Museum.

I 2017 ble Hamre utnevnt til kommandør av St. Olavs Orden «for den framståande innsatsen hans for norsk folkemusikk». Han har også mottatt ei rekkje andre prisar og utmerkingar, mellom anna Myllarprisen (1986), Edvard Grieg-prisen (1993), Hilmarprisen (1993) og Anders Kjerlands minnepris (2000).

Les mier i Store norske leksikon

Kommentarer

Kommentaren din publiseres her. Fagansvarlig eller redaktør svarer når de kan.

Du må være logget inn for å kommentere.

eller registrer deg