Kjersti Kollbotn

Faktaboks

Kjersti Kollbotn
Født
27. februar 1959, Breim i Gloppen, Vestland
Av /Cappelen Damm.

Artikkelstart

Kjersti Kollbotn er ein norsk forfattar. I bøkene sine kombinerer ho realisme og poesi i usentimentale skildringar av sårbare menneske.

Bakgrunn

Kjersti Kollbotn er fødd i Breim i Gloppen i Sogn og Fjordane (no Vestland). Ho er utdanna sivilingeniør sidan 1993, med doktorgrad i byplanlegging frå NTNU. Kollbotn har vore forskar ved Norsk institutt for by- og regionforsking, men har i tillegg vore elev ved forfattarstudia både i Tromsø og .

Forfattarskapen

Romanane til Kollbotn blandar rå realisme med poesi i skildringar av folk og landskap. Kollbotn debuterte med Eg er mamma. Eg skal vere god (2009) og fekk Blix-prisen for denne romanen i 2010. Både i debutboka og i Taxi (2011) skriv ho fram sårbare og utsette kvinnelagnader, med barn som vert utrygge når dei vaksne ikkje er stabile i kjensleliv og handling.

I Isbrann (2014) er synsvinkelen lagd til mannen i eit dysfunksjonelt parforhold, der samansette lengslar og urealiserte draumar skaper mykje vondt. Romanen Jord (2017) er ei forteljing om fleire generasjonar sitt slit på eit gardsbruk i første halvdel av 1900-talet, der plikta lyt gå først. Kjenslene får kome seinare, om det vert mogleg.

I Dis (2020) møter vi att personane frå debutromanen. Barna er no vaksne og sterkt prega av den omsorgssvikten som den første boka skildra. Hovudpersonen i Dis er Tordis, som slit med verknadene etter barneår med ei svært ustabil mor.

Anna engasjement

Kollbotn har òg vore bokmeldar, mellom anna i tidsskriftet Marg. Ho var styremedlem i Nordnorsk Forfatterlag i 2007–2011. Ho blei medlem i Den norske Forfatterforening (DnF) i 2012 og vart i 2018 medlem av Det litterære råd i DnF.

Utmerkingar

Kollbotn fekk Tanums kvinnestipend i 2015 og blei nominert til Havmannsprisen i 2017 for romanen Jord. I 2019 fekk ho det årlege arbeidsstipendet på 100 000 kroner som dei nordnorske fylka gir til forfattarar frå regionen.

Bibliografi

  • Dis (Roman, Cappelen Damm, 2020)
  • Jord (Roman, Cappelen Damm, 2017)
  • Isbrann (Roman, Cappelen Damm, 2014)
  • Taxi! (Roman, Cappelen Damm, 2011)
  • Eg er mamma. Eg skal vere god. (Roman, 2009)

Les meir i Store norske leksikon

Eksterne lenker

Litteratur

  • Ove Eide: «Om å leve med seg sjølv. Ein introduksjon til Kjersti Kollbotn sin forfattarskap», Jul i Nordfjord 2014. Sandane 2014

Kommentarer

Kommentaren din publiseres her. Fagansvarlig eller redaktør svarer når de kan.

Du må være logget inn for å kommentere.

eller registrer deg