Karmøy

Karmøy

Av /Store norske leksikon ※.

Karmøy er ei øy som utgjer størstedelen av Karmøy kommune i Rogaland. Øya, som ligg nord for munningen av Boknafjorden og med nordspissen like utanfor bysenteret i Haugesund, er rundt 30 kilometer lang, opptil 9 kilometer brei, og er med eit areal på 176,8 km2 den største øya i fylket.

Karmøy har 33 027 innbyggjarar (2020), og er dimed også Sør-Noregs mest folkerike øy. Det har vore stor vekst i folketalet sidan 1960-åra.

Karmøy har fastlandssamband ved bru på E134 over Karmsundet. Denne fører heilt fram til Haugesund lufthamn, Karmøy som ligg på Helganeset på vestsida av øya. Det viktigaste nord–sør-sambandet over Karmøya er fylkesveg 547 som følgjer vestsida av øya frå Skudeneshavn nordover til Åkrehamn der han går over til Kopervik på austsida. Herfrå følgjer vegen austsida til E134 i Våge. I 2013 blei Karmøytunnelen under Karmsundet og Førresfjorden, ledd i det såkalla T-sambandet, opna. Dette gir søre del av Karmøy eit direkte samband austover til E39 i Tysvær, samstundes som ho ved ei avgreining på øya Fosen mellom Karmsundet og Førresfjorden gir eit samband nordover til fastlandsdelen av Karmøy kommune utanom Haugesund (fylkesveg 554).

Namnet kjem av norrønt Kǫrmt, genitiv Karmtar, som truleg er ei avleiing av karmr, 'den som dannar karm', i tydinga vern mot havet.

Kart

Karmøy
Karmøy
Av /Statens kartverk.

Les meir i Store norske leksikon

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg