Faktaboks

Jon Naustdalslid
Fødd
20. mai 1945, Naustdal i Sunnfjord

Jon Naustdalslid er ein norsk samfunnsforskar med særleg kjennskap til kommunane sine livsvilkår i krysset mellom lokalt folkestyre og sentralt pålagde oppgåver.

Han tok examen artium ved Firda gymnas på Sandane i 1966 og magistergraden i statsvitskap ved Universitetet i Oslo i 1974. Frå 1975 til 1985 arbeidde han som amanuensis ved Sogn og Fjordane distriktshøgskule og i 1985–1988 som rådgivar for Norad i Tanzania. Frå 1988 til han gjekk av med pensjon i 2012 var han tilsett ved Norsk institutt for by- og regionforsking, NIBR, i Oslo, i perioden 1989–1995 som forskingssjef og i 1995–2007 som instituttsjef.

Magisteravhandlinga til Naustdalslid handlar om motstridande interesser i norsk distriktsutbygging. Det har vore tema i mykje av forskinga hans. Då eit offentleg utval kom med tilrådingar om kommunesamanslåingar i byrjinga av 1990-åra, gjekk Naustdalslid kritisk igjennom forslaga i boka Dei arme små. Kritisk lys på framlegget til ny kommuneinndeling. I artiklane «Samfunnsforsking og styring i kunnskapssamfunnet» og «Kommuneinndelinga: 'Stor og sterk eller liten og lykkeleg?'» er kjernespørsmålet kva rolle det lokale sjølvstyret kan spele i samfunnsutviklinga.

Naustdalslid har samla mange av forskingsperspektiva i tre framtidsmodellar. I «Kjernen» er kommunegrensene uendra. Politikken handlar om å utvikle nærdemokrati, men staten har overteke mange av velferdsoppgåvene – ei avkommunalisering. I «Fusjonen» har vi få kommunar, med større avstand mellom folkevalde og folket – ei avdemokratisering. I «Hybriden» består småkommunane og løyser oppgåvene gjennom interkommunale ordningar, i praksis eit nytt styringsnivå.

Naustdalslid utga i 2022 boka Klimatrusselen. Krise for demokratiet? der han åtvarar mot å ty til ikkje-demokratiske verkemidler for å handtere klimautfordringane.

Les meir i Store norske leksikon

Litteratur

  • Jon Naustdalslid og Andreas Hompland: Dei arme små. Kritisk lys på framlegget til ny kommuneinndeling. Oslo 1993
  • Jon Naustdalslid: «Samfunnsforsking og styring i kunnskapssamfunnet», i A.L. Fimreite, H.O. Larsen og J. Aars (red.): Lekmannsstyre under press. Oslo 2001
  • Jon Naustdalslid: «Kommuneinndelinga: 'Stor og sterk eller liten og lykkeleg?'», i Aage Engesæter, Jan Inge Fardal, Lars Ned (red.): Tankerekkjer. Festskrift til Johs. B. Thue – 70 år. Leikanger 2010
  • Jon Naustdalslid: «Framtida for kommunane», Plan nr. 2/2012

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg