Jakob Sverdrup (språkforsker)

Jakob Sverdrup d.y. var fødd i Leikanger i Sogn (no Sogndal i Vestland). Han var son av biskop Jakob Liv Rosted Sverdrup. Han tok embetseksamen i språkhistorie i 1908, og i 1917 vart han dosent. I 1929 tok han doktorgraden, med avhandlinga Zum germanischen Verbalsystem.

Same året fekk han stilling som professor i germansk filologi ved Det Kongelige Fredriks Universitet i Oslo. Verket Kortfattet tysk sproghistorie. Lyd- og formsystemets utvikling, som var meint for tyskstudentar ved universitetet, kom ut i 1930. Sverdrup sjølv karakteriserte verket som ei vitskapleg innføring i studiet av tysk språk. Han utarbeidde òg ei tysk-norsk ordbok, som kom ut i 1933–1936.

I boka Maal og maalskyldskap frå 1916 gav Sverdrup eit oversyn av språkforskinga si historie, frå det antikke Hellas til hans eiga samtid, med hovudvekt på etymologi. Boka drøftar òg kva type vitskap språkforsking er og bør vere.

• norsk språkhistorie
• filologi
• germanske språk
• språkvitskap