Jürgen Fuchs

Han havna i konflikt med partiapparatet alt i skuledagane. I 1971 fekk han likevel plass på studiet i sosialpsykologi på Friedrich-Schiller-Universitetet i Jena. Her vart han raskt ein markant person i studentmiljøet. Han markerte seg både som politisk debattant og som lyrikar.

I 1973 melde han seg inn i kommunistpartiet. I 1975 vart han ekskludert frå partiet og frå den kommunistiske ungdomsorganisasjonen FDJ. Kort tid etter vart han også kasta ut av universitetet, utan å ha fullført studiet. Samstundes fekk han studieforbod i heile DDR. Fuchs vart arrestert 19. november 1976 i samband med protestaksjonane mot at DDR-styresmaktene hadde trekt tilbake DDR-statsborgaren til songaren Wolf Biermann. Etter ni månader i fengsel, vart Fuchs utvist frå DDR.

Fuchs slo seg ned i Vest-Berlin saman med familien sin. Der vart han snart ein av dei aller viktigaste kontaktpersonane for borgarrettsaktivistane i DDR. Han engasjerte seg også i den vest-tyske forfattarforeininga, og arbeidde for å få dei til å støtte dei regimekritiske kreftene i DDR.

DDRs tryggingspoliti Stasi såg Fuchs som ein farleg fiende, og brukte mykje krefter på å overvake og trakassere Fuchs.

Jürgen Fuchs debuterte som forfattar i 1977 med boka Gedächtnisprotokolle. Han skreiv både romanar og lyrikk og var ein markant person i den tyske offentlegheita. Han skreiv mellom anna for det tonegjevande nyhendemagasinet Der Spiegel.

Som forfattar var Fuchs særleg opptatt av mangelen på politisk fridom i DDR og av Stasis forfølging av dei opposisjonelle i DDR. Etter at Berlinmuren fall i 1989 engasjerte han seg sterkt for å oppklare brotsverk begått av Stasi. Fuchs fekk fleire utmerkingar for arbeidet sitt. I 1982 fekk han Marburger Litteraturpreis, og i 1988 fekk han den tyske kritikarprisen.

Jürgen Fuchs døde av leukemi i 1999. Både han sjølv og fleire av kampfellene hans frå borgarrettsrørsla mistenkte at han hadde fått kreft som følgje av at han vart utsett for radioaktiv stråling då han sat fengsla i DDR.

• Tysklands historie