Jørgen Vikør

Jørgen Vikør var fødd i Norheimsund (no Kvam) i Hardanger, Hordaland (no Vestland). Vikør var elektromontør ved Kvam Kraftverk i åtte år før han som sjølvlærd fotograf skipa eiga fotoforretning og dreiv Hardanger Fotosentral. Spelstykka han skreiv til ungdomslaget opna for ein produktiv forfattarskap.

Vikør skreiv eit tjuetals bøker – romanar og bøker for barn og ungdom, mellom anna Rita, Rolv og ringen. Forteljestilen er reinskoren realistisk, og språket er godt. Mange av utgivingane fekk fleire opplag. Samla kom bøkene i over 70 000 eksemplar medan forfattaren levde. Av skodespela er tre trykte.

Romandebuten, med Makter som møtest, vart lagd merke til. Konfliktar i bygdemiljø er eit gjennomgåande tema i bøkene til Vikør. Intrigen i bøkene stig ofte fram av motsetnaden mellom generasjonane, der dei unge må kjempe for å vinne rom for seg og sitt. Dei unge viser eit meir ope syn på liv og samfunnstilhøve enn foreldra. Forfattaren står heile tida på ungdomen si side. Vikør er også oppteken av spenningar i forholdet mellom ulike religiøse grupper i eit bygdesamfunn. For romanen Gjennom framandt land (1952) fekk han Melsomprisen.

• Noregs litteraturhistorie
• roman
• fotografi
• barne- og ungdomslitteratur

• Knut L. Måge: Hardanger-Bibliografi. Norheimsund 1978
• Anders Rosseland (skriftstyrar): Festskrift til Norheimsund Ungdomslag ved 60-årsjubileet. Øystese 1953
• Lars Hanssen Torpe: Ættarbok for Kvam, bd. 3. Kvam 1972