Faktaboks

Ivar Refsdal
Fødd
6. april 1866, Vik, Sogn og Fjordane
Død
4. april 1939, Oslo
Verke
Lærar og kartograf
Familie

Foreldre: Lærar, gardbrukar og stortingsmann Anfinn Larsen Refsdal (1839–1920) og Anna Bentsdatter Risløv (1839–69).

Gift 31.3.1896 med lærar Kristine Marie Rasmussen (1.12.1865–2.9.1934), dotter til skipsførar Christen Abel Rasmussen (1825–66) og Margrete Larsdatter Gundersen (1832–1917).

Farfar til Sjur Refsdal (1935–); morfar til Johs. Aanderaa (1927–91).

Ivar Refsdal
Ivar Refsdal
Av .
Skoleatlas
Av /Fylkesarkivet i Sogn og Fjordane.

Ivar Refsdal var ein norsk lærar og kartograf. Som kartteiknar var han nyskapande i måten å framstille karta sine på, der fag og kunstnarleg uttrykk vart vovne i hop på ein pedagogisk velutvikla måte.

Ivar Refsdal var fødd i Vik i Sogn og døydde i Oslo. Han gjekk lærarskulen på Hamar, der han tok eksamen i 1885. Han starta lærargjerninga si i Herand i Ullensvang i 1886, hadde så lærarpostar i Arnafjord og Hisøy, før han reiste til Foss skole i Kristiania i 1901. Han slutta å undervise ved Foss i 1926 – 60 år gamal – for å drive med det han likte og kunne aller best: å teikne kart. Lærargjerninga var ei nyttig erfaring å ta med seg i nybrotsarbeidet med å gi ut pedagogisk tilrettelagde kart og atlas.

Det første kartarbeidet kom alt i 1897, og han teikna frå no av kart over Noreg og Norden, Europa og verdsdelane. Karta vart gitt ut som veggkart eller samla i atlas. Det særmerkte med karta frå Refsdals hand var sjølve teiknemåten, med eit vakkert, kunstnarleg tilsnitt. Måten han skraverte fjell og dalar på, den særmerkte kalligrafiskrivemåten og bruken av fargar gjorde han til ein original, pedagogisk og nyskapande kartteiknar.

Les meir i Store norske leksikon

Litteratur

Sæbø, A. I., red. (1995): Ivar Refsdal 1866–1939 kartograf, lærar, diktar, teiknar. Vik i Sogn: Vik lokalhistoriske arkiv

Faktaboks

Ivar Refsdal
Historisk befolkingsregister-ID
pf01036392199966

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg