Ingvild Bryn

Bryn kjem frå Voss. Etter examen artium ved Voss gymnas i 1980 var ho journalist i lokalavisa Horda Tidend (1980–1981). Dernest studerte ho norsk grunnfag og journalistikk ved Høgskulen i Volda (1981–1984) og statsvitskap ved Universitetet i Oslo (1985–1986).

Bryn er gift med Svein Gjerdåker.

Frå 1984 tok Bryn til å arbeide for NRK, først i NRK Hordaland (1984–1985) og sidan som reporter og vaktsjef i Dagsnytt. I perioden 1990–1992 var Bryn NRK-korrespondent i Stockholm. I 1992 vart ho programleiar i Dagsrevyen.

Bryn har òg utført andre oppgåver for NRK. Saman med Morten Harket var ho i 1996 programleiar for Eurovision Song Contest i Oslo Spektrum. Frå 1995 til 1999 var ho korrespondent i Washington i USA. Som første kvinne var ho i 2001 programleiar i NRK si sending under valnatta. Sidan har ho vore med på fleire valsendingar, mellom anna ved den amerikanske valvaka i 2008, 2016 og 2020.

Utanfor NRK har Bryn hatt ei rekkje engasjement. Mellom anna har ho vore aktiv i Mediemållaget, der ho var styreleiar frå 1988 til 1990 og sat i styret frå 2004 til 2010. Ho har òg vore aktiv i Verdens Barn, den eldste adoptivforeininga i Noreg.

Bryn fekk Kringkastingsprisen i 1998 og Alf Helleviks mediemålpris i 2004, begge for arbeidet med nynorsk i media.

I 2012 vart Bryn, saman med Arill Riise i TV 2, kåra til Årets nynorskbrukar. Dei fekk prisen for utsøkt språkbruk og framifrå bruk av normert nynorsk i moderne nyheitsjournalistikk i radio og TV. Same år blei Bryn tildelt Storegutprisen.

I 2022 vart Bryn tildelt Kringkastingssjefens språkpris.

• NRK
• nynorsk
• Eurovision Song Contest