Forretningsmann, president i Paraguay frå 2013. Cartes blei vald til president 21. april 2013 som kandidat for det høgreorienterte Coloradopartiet, og blei sverga inn som president 15. august same år. Han vann med 45,91 prosent av stemmene mot 36,84 prosent til motkandidaten Efraín Alegre frå partiet Partido Liberal Radical Auténtico. 

Først politisk involvert i 2008, har Cartes hatt ei relativt kort politisk karriere. Han blei medlem av Coloradopartiet i 2009, med eit uttala ønske om å gjere Paraguay til ei motvekt mot dei mange andre venstrestyrte landa i regionen i denne perioden. Under slagordet «nuevo rumbo», som betyr ny kurs, gjekk Cartes til val på ei auka satsing på infrastruktur, effektivisering og modernisering av offentleg sektor og statlege bedrifter, jordreform og fleire arbeidsplassar.

Cartes er rekna som ein av Paraguay sine rikaste menn, og har hovudsakleg tent formuen sin i tobakksindustrien og gjennom bankverksemd. Både Cartes sjølv og hans veg til makta har vore gjenstand for kontroversar og spekulasjonar. Han hadde fengselsopphald både i 1986 og i 1989 som følge av anklagar om valutasvindel, men blei begge gongene frikjend i retten. Både WikiLeaks-dokument og politiske motstandarar har i løpet av dei seinare åra knytt Cartes til både narkotikatrafikk og kvitvasking av pengar. Under valkampen i 2013 fekk han også stor merksemd for sine sterke reaksjoner mot homofile.

Eit av Cartes sine viktigaste bidrag så langt i presidentperioden har vore innføringa av meir opne og gjennomsiktige politiske prosessar for å få bukt med den høge korrupsjonen i landet. Samstundes har presidenten blitt sterkt kritisert for å undertrykke sivilsamfunnet og ulike grupper sine krav om ein meir rettferdig fordeling av goder, til fordel for innføringa av ein neoliberal økonomisk struktur. 

Presidenten har i det heile hatt problem med å få gjennomslag for reformane han lova under valkampen, då han anten må forhandle med det Liberale partiet eller ein koalisjon på venstresida om gjennomslag. Vanskar med å framstå som slagkraftig nok har gjort at Cartes har stupt i popularitet på meiningsmålingane. Særskilt har dei unge veljarane vist lite tålmod, i lys av den stadig høge arbeidsløysa i landet. 

I Paraguay kan presidenten berre sitje i ein periode på fem år. I 2016 ytra Cartes likevel eit ønske om å stille til val som president for ein ny periode, noko som eventuelt først må føre til ei kontroversiell grunnlovsendring i landet.

Foreslå endringer i tekst

Foreslå bilder til artikkelen

Kommentarer

Har du spørsmål om artikkelen? Skriv her, så får du svar fra fagansvarlig eller redaktør.

Du må være logget inn for å kommentere.