Faktaboks

Heidi Grande Røys
Fødd
6. mai 1967, Bremanger, Vestland
Heidi Grande Røys, 2009
Heidi Grande Røys, 2009
Av /𝒲.
Lisens: CC BY SA 3.0

Heidi Grande Røys er politikar og barnehagelærar. Ho har representert Sosialistisk Venstreparti (SV) på både lokal- og riksnivå og var fornyings- og administrasjonsminister 2005–2009.

Heidi Grande Røys vart fødd i Bremanger i Sunnfjord og er utdanna førskulelærar ved Bergen lærarhøgskule i 1989. Ho har vore avdelingsleiar og styrar ved Havreneset barnehage i Florø i åra 1989–1996. Etter at ho gav seg som statsråd i 2009 vart ho igjen barnehagestyrar i Florø.

Røys har representert Sosialistisk Venstreparti (SV) i Flora formannskap og bystyre og har hatt ulike verv i SV lokalt og på fylkesplan. I 1999–2000 var ho politisk rådgivar i SV si stortingsgruppe, og i 2001 vart ho vald inn som den første stortingsrepresentanten frå Sogn og Fjordane for SV nokon gong. Ved stortingsvalet i 2005 vart Røys ikkje attvald, men hausten same året vart ho utnemnd til statsråd med ansvar for det nyoppretta Fornyings- og administrasjonsdepartementet i den andre Stoltenbergregjeringa. Denne stillinga hadde ho til 2009.

Som minister engasjerte Røys seg i ei rekkje tiltak for å fornye offentleg sektor, mellom anna fleire miljøtiltak, høgare etikkrav, betre språk, større openheit og ein mindre marknadsretta arbeidsgivarpolitikk. Eit hovudprosjekt var arbeidet med å forenkle bruken av offentlege tenester på Internett og utbygging av breiband i distrikta.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg