Faktaboks

Harald Stanghelle
Fødd
13. januar 1956, Vaksdal
Harald Stanghelle
Harald Stanghelle
Av .
Lisens: CC BY ND 2.0

Harald Stanghelle er ein norsk journalist og redaktør frå Stanghelle i Vestland. Han var politisk redaktør i Aftenposten i 2000–2014. Frå 2014 til 2018 var han redaktør og stadfortredar til sjefredaktøren. Han har i mange år vore ein profilert debattant og meiningsberar om politikk og samfunnsspørsmål i vid forstand. Stanghelle forlét redaktørstillinga i Aftenposten hausten 2018. Han er frå 2019 leiar av hovudprogramkomiteen for Arendalsuka.

Karriere

Allereie som 15-åring var Stanghelle aktiv frilansar i avisa Dagen i Bergen. Han var redaktør i Vaksdals-nytt i 1975–1977, assisterande presseoffiser for FN-styrken i Libanon i 1979–1980, journalist i Dag og Tid i 1980–1981 og journalist i Arbeiderbladet i 1982–1991. I 1991 blei han tilsett i Aftenposten, der han var nyheitsredaktør i 1994–1995. Han var sjefredaktør i Dagbladet i 1995–2000, før han returnerte til Aftenposten.

Verv

Stanghelle var leiar i Norsk Redaktørforening frå 2009 til 2018, styremedlem i Norsk Presseforbund frå 2007 til 2018 og medlem av hovudstyret i Norske Avisers Landsforening frå 1997 til 2001. Stanghelle gjekk på Forsvarets høgskole i 1988.

Utmerkingar

Harald Stanghelle har fått fleire prisar og utmerkingar for god journalistikk, mellom anna SKUP-prisen 1991, Den store journalistprisen 2001 og Gullpennen 2006. Saman med Egil Ulateig gav han ut Forsvareren. Alf Nordhus 70 år. Et debattskrift i 1989 om juristen Alf Nordhus. Blant dei mange sakene Stanghelle har engasjert seg sterkt i, står Treholt-saka i ei særstilling.

Utgivingar

  • Forsvareren. Alf Nordhus 70 år. Et debattskrift (saman med Egil Ulateig), 1989
  • Speil for tidens ansikt, 2009
  • Nina Sundbye, 2016
  • Gullvåg – maleren (saman med Svein Olav Hoff), 2019
  • Kongen forteller, 2020

Les meir i Store norske leksikon

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg