Artikkelstart
For Bygd og By var det første nynorske familiebladet. Det kom ut i Oslo 1912–1932.
For Bygd og By vart skipa i 1912 og gjekk inn i 1932. Dei første nummera var utgitt av kunstforlaget Munin, som vart drive av Gudveig Høyem. Frå tredje nummeret i andre årgangen kom bladet ut hos Olaf Norli.
Det var eit illustrert nynorsk familieblad. Det hadde artiklar frå inn- og utland, litterære tekstar, omtale av forfattarar, politikarar og andre, nyhende frå vitskap og teknikk, og annonsar. Bladet hadde fleire faste spalter, «Heimen», «Aat smaafolke» og «I kveldseta». I tidlege år følgde det stundom bolkevis tilleggsbøker med bladet.
Dei første åra var mange innom redaktørstolen: Kristofer Uppdal (1912), Oskar Braaten (1912), Joh. B. Mikalson (1913), Halfdan Asphaug (sommaren 1913) og Ivar Høvik (1914). I tida 1915–1919 var Severin Eskeland redaktør. Hulda Garborg redigerte bladet i 1920, sonen Aadne Olaus Fjørtoft Garborg, «Tuften», var redaksjonssekretær. Han var den einaste redaksjonssekretæren i bladet si levetid. Frå 1921 til september 1924 var Anton Beinset og Arne Falk redaktørar, deretter var Falk eineredaktør.
Det meste av tida kom bladet ut annakvar veke. Ein periode i 1928–29 kom det med tre nummer i månaden. Kvart nummer var på 16 sider, og kvar årgang, med unntak av 1915, vart avslutta med eit større julehefte. Frå nr. 7 i 1913 vart bladet prenta hos Nikolai Olsen. I gjennomsnitt hadde For Bygd og By eit opplag på 3000–4000.
Kommentarer
Kommentaren din publiseres her. Fagansvarlig eller redaktør svarer når de kan.
Du må være logget inn for å kommentere.