Finn Kvalem

Faktaboks

Finn Kvalem
Født
12. april 1934, Seljord, Vestfold og Telemark
Død
26. februar 1990, Oslo

Artikkelstart

Finn Kvalem var ein norsk skodespelar, instruktør og omsetjar. Han byrja karrieren sin ved Det Norske Teatret og var tilknytt teatret i 14 år, frå 1956 til 1969, og seinare tilsett ved Nationaltheatret, Fjernsynsteatret og Telemark Teater. Han omsette i alt 18 skodespel, som alle har vore spela.

Bakgrunn

Finn Kvalem var fødd i Seljord i Telemark. Han var utdanna ved Statens teaterskole i 1953–1956 og debuterte i Regnmakaren av N. Richard Nash på Det Norske Teatret i 1955. Her var han tilsett fram til 1969, då han gjekk over til Nationaltheatret. Han var tilsett i Fjernsynsteatret i 1975–1979 og var sjef for Telemark Teater i 1982–1984, før han i 1985 vende attende til Nationaltheatret.

Som skodespelar hadde Kvalem eit kjenslefullt uttrykk, med gripande tolkingar prega av ein alvorleg og sorgfull undertone. Han var samstundes glitrande i humoristiske roller, noko som syner den store kunstnariske spennvidda hans.

Kvalem var leiar i Norsk Skuespillerforbund i 1974–1976.

Roller

Kvalem var kjend for sitt komiske talent, til dømes som Mads Moen i Peer Gynt (1962), men òg for si sterke innleving, mellom anna som Osvald i Gengangere av Henrik Ibsen ved Det Norske Teatret (1964) og presten Flann i Kolbes Reise av Åge Rønning ved Nationaltheatret (1986).

I Fjernsynsteateret hadde han fleire store roller, mellom anna som mannen i De fire årstider av Arnold Wesker (1968), Dr. Wangel i Fruen fra havet (1979) av Ibsen og Vielgeschrey i Den Stundesløse av Ludvig Holberg (1978). Ei av dei største rollene hadde han som Vidkun Quisling i Stein Ørnhøis fjernsynsserie Vidkun Quisling. Et liv – en rettssak (1988). I fjernsynsserien 1814 (1989) spela han rolla som kammerherre og brukseigar Peder Anker.

Regissør

Han var regissør for ei rekkje framsyningar, mellom anna Neste gang vil jeg synge av James Saunders (1968), Peer Gynt ved Den Nationale Scene (1969) og Kjærlighed uden Strømper ved Nationaltheatret (1971). Han gjendikta mellom anna skodespela Ein seljars død av Arthur Miller (1967), Fødselsdagselskapet av Harold Pinter (1968), Emigrantar av Slawomir Mrożek (1980) og Sommer av Edward Bond (1986).

Filmar

Kvalem var med i fleire filmar, til dømes Barn av solen (1955), Tonny (1962), Psychedelica Blues (1969) og Blücher (1988). Han var ein mykje nytta opplesar og hadde fleire plateutgivingar der han las dikt og eventyr frå heimfylket Telemark.

Les meir i Store norske leksikon

Litteratur

  • Herman Berthelsen (red.): Hvem er hvem i norsk kulturliv? Oslo 1987
  • Leif Mæhle (red.): Det Norske Teatret 75 år. 1963–1988. Oslo 1988
  • Nils J. Ringdal: Nationaltheatrets historie. 1899–1999. Oslo 2000
  • Jo Ørjasæter: Fjernsynsteateret til glede og forargelse. Oslo 1994

Kommentarer

Kommentaren din publiseres her. Fagansvarlig eller redaktør svarer når de kan.

Du må være logget inn for å kommentere.

eller registrer deg