Erling Folkvord

Erling Folkvord er politikar og miljøarbeidar. Han er den einaste som har representert det tidlegare partiet Raud Valallianse (RV) på Stortinget. Gjennom eit sterkt engasjement har han oppnådd å verte høgt respektert også av mange politiske meiningsmotstandarar.

Folkvord er fødd i Levanger . Han har utdanning som sosionom ved Sosialskolen i Trondheim frå 1974 og arbeidde som sosialfullmektig i Oslo 1974–1977, som verneassistent 1977–1988 og seinare som miljøarbeidar.

Han har vore politisk aktiv på venstresida sidan 1960-åra og gjekk med i ml-rørsla frå starten i 1972. Frå 1990 til 1997 var han nestleiar i Arbeidernes Kommunistparti (AKP). I 1984–1985 og 1999–2011 var han bystyremedlem i Oslo for Raudt (tidlegare Raud Valallianse (RV)). I 1993 til 1997 var han stortingsrepresentant for RV.

Folkvord sitt engasjement spenner breitt radikalt. Han har ikkje minst vore oppteken av å avsløre korrupsjon og maktmisbruk, noko han tok opp i boka Rapport frå rottereiret (1990). I 2003–2005 var han leiar for Organisasjonen mot politisk overvaking (OPO).

Folkvord har skrive og redigert ei rekkje politiske bøker og hefte og er ein flittig skribent i ulike aviser.