Edward Thomas

Edward Thomas var fødd i London av walisiske foreldre. Han fekk grunnutdanninga si ved St. Paul School i London og studerte ved Lincoln College, Oxford. Etter at han gifte seg som student i Oxford, tok han ulike skriveoppdrag for å forsørge familien. Når det var praktisk mogleg tok han lange vandreturar i England og Wales. I 1915 blei Thomas innrullert i det britiske infanteriet som kjempa i første verdskrigen. Han fall på første dagen av slaget om Arras, 9. april 1917.

Thomas' publikasjonar inkluderer essay, historie, kritikk, biografiar, bokmeldingar, introduksjonar og topografiske reiseskildringar. Samla dannar denne varierte forfattarskapen ein original og verdifull bakgrunn for lyrikken han skreiv mot slutten av det korte livet sitt. Då han tok til å skrive lyrikk rundt utbrotet av første verdskrigen i 1914, var det etter innstendig oppmoding frå den amerikanske lyrikaren Robert Frost. Dei to blei nære vener under Frosts opphald i England, og Frost oppmuntra Thomas til å konsentrere seg om lyrikksjangeren.

Det er lyrikksamlingane Six Poems (1916), Poems (1917) og Last Poems (1918) som har gitt Thomas ein varig plass i engelsk litteratur. Dei seks dikta i den første samlinga, som Thomas publiserte under pseudonymet Edward Eastaway, var dei einaste han opplevde å få sjå utgitt; han blei drepen i slaget om Arras medan Poems blei trykt.

Thomas er saman med Wilfred Owen, Robert Graves, Siegfried Sassoon, Isaac Rosenberg og Rubert Brooke blant dei britiske lyrikarane som skreiv dikt sterkt prega av første verdskrigen. Dikta deira formidlar krigserfaringar til dels svært forskjellig. Medan Brookes dikt er prega av patriotisk idealisme, og medan Owen gir rystande skildringar av menneskeleg liding på vestfronten, skildrar Thomas krigen mindre direkte, men verknadsfullt. Dikt som "Adlestrop" og "The Owl" framstiller den brutale krigen indirekte og konstrastivt gjennom skildringar av livet på landsbygda i England i fredstid. Effekten Thomas slik oppnår, kan minne om similene som Homer brukar for å sidestille og kontrastere krig og fred i eposet Iliaden.

Tre samlande tema i Thomas' tre diktsamlingar er for det første krigens realitet og verknaden den har på individet, for det andre diktarens djupe einsemd, og for det tredje ein stadig tydelegare økologisk dimensjon der Thomas framstiller krig mellom menneske også som ein krig mot naturen. Samankoplinga av det rolege engelske landskapet og krigen på vestfronten gir dikta til Thomas ein observerande og reflekterande kvalitet som minner om Thomas Hardys dikt, og som har fått fleire kritikarar til å vurdere han som ein tidleg eksistensialist som appellerer til moderne lesarar. Det nære forholdet hans til, og respekten hans for, naturen peikar framover mot lyrikarar som Ted Hughes og Seamus Heaney.

Lyrikken til Thomas er blitt gradvis høgare vurdert gjennom dei siste tiåra. I 2012 skreiv Nick Dear eit skodespel om dei siste sju åra av Thomas' liv, The Dark Earth and the Light Sky, og same året publiserte Matthew Hollis ei bok om Thomas' vennskap med Robert Frost, Now All Roads Lead to France: The Last Years of Edward Thomas. Jean Moorcrofts biografi Edward Thomas: From Adlestrop to Arras (2015) gir ei detaljert skildring av Thomas' liv, inkludert kampen hans mot depresjon, familieproblem og sjølvmordsforsøk.

• Storbritannias litteratur
• første verdenskrig

• Alexander, Michael (2013). A History of English Literature. London: Palgrave Macmillan.
• Hollis, Matthew (2012). Now All Roads Lead to France: The Last Years of Edward Thomas. London: Norton.
• Moorcroft, Jean (2015). Edward Thomas: From Adlestrop to Arras. London: Bloomsbury.
• Motion, Andrew (2010). The Poetry of Edward Thomas. London: The Hogarth Press.