Christian Vidsteen

Faktaboks

Christian Vidsteen

Christian Bang Vidsteen

Født
11. januar 1832, Tysnes, Vestland
Død
8. februar 1915, Leirvik i Stord, Vestland

Artikkelstart

Christian Vidsteen var lege og språkgranskar. Han gav ut bøker om bygdemåla i Sunnhordland, Hardanger og på Voss og skreiv ei dansk-norsk ordbok.

Bakgrunn

Christian Bang Vidsteen var fødd i Tysnes i noverande Vestland og døydde i LeirvikStord i Søndre Bergenhus amt (no Vestland). Han tok examen artium ved katedralskulen i Bergen i 1848 og medisinsk embetseksamen i 1856 ved universitetet i Kristiania. Deretter reiste han på studietur i utlandet eit år. Det meste av tida var han i Wien og Paris.

Etter eit par månader som praksislege i Bergen vart han i mai 1858 konstituert som distriktslege i ytre Hardanger. Allereie same hausten vart han utnemnd til distriktslege i indre Sunnfjord. Frå hausten 1863 var han distriktslege i ytre Sunnhordland.

Språkgransking

Han tok avskil frå legegjerninga i juni 1882 og vigde seg til språkgransking. Same året gav han ut Oplysninger om Bygdemaalene i Søndhordland. Han var så på Island nærare eitt år for å lære islandsk betre. I 1884 gav han ut Oplysninger om Vossemaalet, året etter Oplysninger om Bygdemaalene i Hardanger.

I1900 kom Ordbog over Bygdemaalene i Søndhordland. Med en kortfattet Lydlære og Bøiningslære samt Sprogprøver, som blir rekna som hovudverket hans. Boka har etter Marius Hægstads utrekning 14 000 oppslagsord. I 1907 vart Dansk-norsk Ordbog utgitt, ei ordbok med danske oppslagsord og omsetjingarlandsmål. Ordbog over Bygdemaalene i Søndhordland kom i ny utgåve ved Sunnhordland folkemuseum og sogelag i 1983.

Ettermæle

Landeigedomen sin, «Furulund», gav han til Leirvik Brand- og bygningskommune mellom anna på det vilkåret at det skulle vere ein park for folk i Leirvik. Parken, som Stord kommune i dag har hand om, er på ca. 15 mål og gir tilhald for Sunnhordland museum.

Les meir i Store norske leksikon

Litteratur

  • Bergens Kathedralskoles Historie fra 1826 til 1858. Bergen 1859
  • Severin Eskeland: «' Ein god son av si heimbygd'. Chr. Vidsteen». Sunnhordland. Tidsskrift. Utgjeve av Sunnhordland Museum og sogelag. 1948
  • Torleiv Hannas: «Christian Vidsteen». Syn og Segn nr. 9/1915
  • F.C. Kiær: Norges læger i det nittende aarhundrede. 1800–1871. Christiania 1873
  • I. Kobro: Norges læger. 1800–1908. Bd. 2. Kristiania 1915
  • Ole Didrik Lærum: «Christian Vidsteen og vossamålet». Gamalt frå Voss. 1977

Kommentarer

Kommentaren din publiseres her. Fagansvarlig eller redaktør svarer når de kan.

Du må være logget inn for å kommentere.

eller registrer deg