Breim

Breim er ei bygd i Gloppen kommune i Vestland fylke.

Tidlegare var Breim eigen kommune i dåverande Sogn og Fjordane fylke, men vart i 1964 overført til Gloppen kommune med unntak av eit lite område ved sørenden av Breimsvatnet som vart innlemma i Jølster kommune. I 2020 vart Sogn og Fjordane innlemma i Vestland fylke.

Breimsbygda ligg i Nordfjord lengst aust i kommunen og søraust for kommunesenteret. Det er kjent som ei rik og vakker jordbruksbygd. Noko aust for Breimsvatnet går Våtedalen med E 39. Breim har to tettstader; ved Breimsvatnet ligg Re 370 innbyggjarar (2019), og nordlegast i Våtedalen ligg Byrkjelo med 324 innbyggjarar (2019).

Breim kyrkje er ei langkirke frå 1886 på Reed, der det tidlegare har vore i alt fire kyrkjer. Den første var frå 1200-talet og brann saman med prestegarden i 1334.

Breimsbygda IL arrangerte NM i friidrett i 1988 og 1999 på Byrkjelo stadion. I nord ligg Breimsbygda Skisenter på Utvikfjellet.

I Breim ligg fjellet Vora på 1435 meter over havet. På Vorafjellet samla heksene seg til sabbat, ifølgje tradisjonen. Hekseprosessar gjekk føre seg frå slutten av 1500-talet til byrjinga av 1700-talet. Heksene vart brende på Anda, der det i dag står eit monument.

Eggenipa er eit fjell sør for garden Egge i Breim på 1338 meter over havet. Motbakkeløpet Eggenipa opp blir arrangert årleg.