Faktaboks

Birger Jåstad
Fødd
7. oktober 1904, Leirfjord
Død
7. desember 1984, Leirfjord

Birger Jåstad var ein norsk lærar og forfattar frå Leirfjord i Nordland. Han er mest kjend for barnebøkene han skreiv i 1970- og 1980-åra.

Bakgrunn

Jåstad var størsteparten av sitt vaksne liv busett i Vasslia i Leirfjord. Han gjekk på folkehøgskulen i Vefsn, tok lærarutdanning ved Nesna lærerskole 1928 og vidareutdanning på Norges Lærerhøgskole i Trondheim i 1932.

Jåstad starta lærarkarrieren i Troms, men frå 1935 og fram til han gjekk av med pensjon i 1972 arbeidde han som lærar ved Leira skole i Leirfjord. I 1957–1958 underviste han i Mo i Rana.

Jåstad sat i kommunestyret for Venstre, og var ordførar i Leirfjord i 1956–1957. Han var aktiv i ungdomslagsarbeid og var formann i Hålogaland ungdomslag.

Faren Lars Jaastad var òg lærar, forfattar og ordførar.

Forfattarskapen

Jåstads litterære debut var sogespelet Viking Fredlaus (1941).

Han er mest kjend for barnebøkene som kom ut i 1970- og 1980-åra, til dømes Stabburs-ungane (1974), Moselandet (1976) og Kongeørn-ungen (1978). Her møter vi barn som i samspel med foreldre og besteforeldre oppdagar og lærer å setje pris på natur- og kulturarven i lokalsamfunnet.

Diktsamlinga Rimfrostrit (1976) har motiv frå nordnorsk kultur og natur, og kan stå som døme på «nordkalottromantikken» i 1970-åra. Jåstad var mykje nytta som kåsør og talar.

Utmerkingar

For Viking Fredlaus (1941) fekk Jåstad førsteprisen i Noregs Ungdomslags skodespelkonkurranse i 1940. Han fekk tildelt Blix-prisen i 1977 og fekk Kongens fortenestemedalje i sølv i 1975.

Les mer i Store norske leksikon

Litteratur

  • Johs. A. Dale: Frå «Ervingen» til «Anne Gonge». Nynorske skodespel for amatørar. Oslo 1959
  • Øyvind Jenssen: «Forfatteren, læreren og helgelendingen Birger Jåstad», Årbok for Helgeland 2005. Mosjøen 2005
  • Ellisiv Steen: Det norske nasjonalhistoriske drama 1756–1974. Oslo 1976
  • Hallvard Kjelen. «'Moltemyrene våre skal få stå gule' : Økologi og kultur i Birger Jåstads barnebøker». Barnelitterært forskningstidsskrift; nr. 1; 2019

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg