Bergliot

Namnestatistikken for 1800-talet baserer seg på folketeljingar, og då var det oftast registerføraren som bestemte kva for stavevariant som skulle førast inn i teljinga – ikkje namneberaren sjølv. Derfor er variantane Bergljot og Bergliot slått saman, og dei er presenterte med ei felles kurve for 1800-talet. Bergljot – og varianten Bergliot – er blant dei namna som vart populære under den nordiske namnerenessansen (på grunn av Bjørnsons dikt «Bergljot»). Til liks med andre namn som høyrer til namnerenessansen, fekk desse namneformene eit sterkt oppsving i siste halvdel av 1800-talet, og dei var mest brukte tidleg på 1900-talet. Bergljot og Bergliot nådde toppen samtidig (1900–1904).

Bergliot var – til liks med Bergljot – klart mest brukt i Kristiania. (I talgrunnlaget for søylene inngår det også ein eller fleire stavevariantar, til dømes Berglioth.) Til liks med andre namn som kan knytast til den nordiske namnerenessansen, fekk Bergliot fyrst innpass i byen.