Bø i Telemark (tidlegare kommune)

Berggrunnen høyrer til det sørnorske grunnfjellsområdet med mykje harde bergartar som granitt og kvartsitt. Landskapet er kjenneteikna av den vide hovuddalen med Bøelva og skogkledde dalsider og fjell. Godt klima med høge sumartemperaturar gjer at skoggrensa ligg nær 1000 meter over havet.

Høgaste fjelltopp er Jøronnatten på Lifjell på 1275 meter over havet, på grensa til Notodden og Seljord kommunar. Bøelva, frå Seljordsvatnet og gjennom Bø, møter det eigentlege Telemarksvassdraget i Norsjø ved Gvarv, som ligg berre 15 meter over havet.

I dalen er det store sand- og grusmassar. Desse framstår som store sletter eller moer i terrenget, til dømes Eikjamoen og Folkestadmoen om lag 155 meter over havet like nord for Bø. Elles finst sand- og grusavsetningar i ulike trinn, avsett etter som innlandsisen smelta ned og landet steig.

Jordbruk er ein viktig næringsveg, og bruka i Bø er større enn gjennomsnittet for fylket. Store landskapsflater med skog og fjell omkring og dessutan eit stabilt klima gir eit godt grunnlag for kornproduksjon, husdyrhald og fruktdyrking. Vel to tredelar av jordbruksarealet blir nytta til korndyrking, men det er òg stor grasproduksjon til husdyrhaldet. Delar av industrien er direkte knytt til landbruksnæringa. Ein av dei store arbeidsplassane i Bø er avdelinga av Universitetet i Sørøst-Norge, tidlegare Høgskulen i Telemark.

Det er turisttrafikk i Lifjellsområdet både sumar og vinter, og Bø har fleire hotell og campingplassar, og mange hytter. Fritidsparken Bø Sommarland, som ligg cirka 5 kilometer nord for kommunesenteret, er Skandinavias største vasspark.

Bø kommune svarte til soknet Bø i Øvre Telemark prosti. Mot slutten av 1800-talet høyrde Bø til Nedre Telemarken fogderi i Bratsberg amt.

Bø bygdemuseum på Oterholt er ei avdeling av Telemark Museum. Østerli Bygdetun ligg på Lifjell. Telemarkfestivalen, det største folkemusikkarrangementet i fylket, vart stifta i 1990 og vert arrangert kvar sommar. Bø Blad, lokalavisa for Bø, vart grunnlagt i 1986. Avisa har hovudkontor i Bø, kjem ut kvar torsdag og er redigert på nynorsk.

Kommunevåpenet (godkjent i 1988) hadde tre feler i gull på raud bakgrunn og viser til spelemanns- og felemakartradisjonen som har stått sterkt i kommunen.

• Bø – tettstad
• Midt-Telemark