Faktaboks

Alan Walker

Alan Olav Walker, DJ Walkzz, Walkzz

Fødd
24. august 1997, Northampton, England
Alan Walker
Alan Walker
Alan Walker
Alan Walker
Alan Walker har spelt over 600 konsertar sidan han slo gjennom i 2016.
Alan Walker
Av .

Alan Olav Walker er ein norsk-engelsk artist, DJ og produsent innan EDM-sjangeren. Etter gjennombrotet med singelen «Faded» (2015) blei han ein av Noregs mest populære artistar på verdsmarknaden.

Alan Walker og den norske EDM-artisten Kygo er dei einaste norske artistane som over tid har lege på Spotify si liste over dei 100 mest strøymde artistane på verdsbasis.

Tidlege år

Walker har norsk mor og engelsk far. Han er fødd i Northampton, England, er oppvaksen i Fana i Bergen og har dobbelt statsborgarskap. Han var opphavleg mest interessert i dataspel, grafisk design og programmering, men byrja å lage musikk på laptopen sin i 2012. Han lærte seg musikkproduksjon gjennom YouTube-kurs og var inspirert av samtidige EDM-artistar og dessutan filmkomponistar som Hans Zimmer og Steve Jablonsky.

Han byrja å leggje ut musikken sin på YouTube og SoundCloud, og singeldebuten «Fade» (2014) blei ein «viral» hit. Året etter signerte han plate- og management-kontrakt med det norske selskapet Mer, leia av Gunnar Greve, og 3. desember 2015 gav Mer ut singelen «Faded» i samarbeid med svenske Sony. Låten var ei oppussa utgåve av «Fade», mellom anna med eit vokalspor framført av den norske popsongaren Iselin Solheim.

Internasjonalt gjennombrot og debutalbum

I 2016 blei «Faded» ein av dei mest suksessfulle norske singlane gjennom tidene. Han toppa hitlistene i 18 land, blei den første norske songen passerte éin milliard strøymingar på Spotify, og er framleis blant dei 20 og 30 mest avspelte songane på høvesvis YouTube og Spotify.

«Faded» er framleis Walkers største hit og hans einaste plassering på Billboard Hot 100-lista i USA, men han følgde opp med fleire suksessfulle hitsinglar, som «Alone» (2016), «Tired» (2017) og «Darkside» (2018).

Han konsertdebuterte under Winter X Games i Oslo 27. februar 2016, og sidan har han etablert seg som ein populær liveartist. Han har spelt over heile verda, mellom anna i Kina og India for opptil 30 000 tilskodarar. Han har turnert med Rihanna, Justin Bieber og Kygo, og han har spelt på festivalar som Coachella, Lollapalooza, Tomorrowland og Ultra.

I desember 2018 kom debutalbumet Different World, som toppa listene i Noreg og Finland og plasserte seg i Topp 20 i Sverige og Sveits. Singlane som følgde i 2019, klarte derimot ikkje å tangere tidlegare hitlistebragder, bortsett frå i Noreg. I november 2021 kom det andre albumet hans, World of Walker.

Stil

Walker viser seg som regel fram kamuflert i maske og hettegenser, og han omgir seg med ein aura av mystikk, futurisme og data-estetikk i musikkvideoane og på konsertane sine.

Musikalsk er han langt mørkare og meir mollstemt enn harmoniane som pregar Kygos samtidige tropiske house. Musikken til Walker kan minne meir om progressiv house og 1990-talet sin trancemusikk i noko saktare tempo, eller dubstep der dei rytmiske kantane er filte vekk.

Samarbeid

I studio samarbeider han med mange låtskrivarar, som dei tidlegare rapparane Gunnar Greve (frå Spetakkel) og Øyvind «Vinni» Sauvik (frå Paperboys) og dessutan Anders Frøen og Magnus Bertelsen (som gir ut eigen musikk under artistnamnet Minus Manus).

På vokal- og remiks-sida har Walker samarbeidd med mellom anna Avicii, Kygo, Julie Bergan, Tomine Harket, Isák, Ava Max, Noah Cyrus, Bruno Mars, Coldplay, Sia, Miley Cyrus, A$AP Rocky, Steve Aoki og Tiësto.

Prisar og anna

Alan Walker har vunne tre Spellemannprisar, Årets Låt for «Faded», Eksportprisen for 2016 og dessutan Årets spellemann for 2018. I tillegg har han blant anna vunne tre Årets Norske Artist-prisar i MTV Europe Music Awards 2016–2018 og vore på Billboards 21 under 21-liste.

Walker er ein av dei artistane i Noreg som tener mest. I 2017 hadde Alan Walker AS eit resultat før skatt på 9,1 millionar kroner, som i 2018 hadde auka til 26,2 millionar. Gjennom hovudselskapet sitt hadde han i 2022 inntekter på over 200 millionar kroner.

I november 2019 lanserte Walker dataspelet The Aviation Game.

Les meir i Store norske leksikon

Eksterne lenker

Kommentarar

Kommentarar til artikkelen blir synleg for alle. Ikkje skriv inn sensitive opplysningar, for eksempel helseopplysningar. Fagansvarleg eller redaktør svarar når dei kan. Det kan ta tid før du får svar.

Du må være logga inn for å kommentere.

eller registrer deg