Lars S. Spildo

Lars Sjurson Spildo vaks opp på ein vanleg vestlandsgard, med fôrdyrking og husdyrhald. Etter eksamen på Stend landbruksskole i 1919 og artiumskurs i Volda i 1921 studerte han ved Norges Landbrukshøgskole (NLH), der han vart uteksaminert i 1924. Den første tida etter eksamen hadde han fleire kortvarige tilsettingar til han i 1926 vart tilsett som landbrukslærar ved Holt landbruksskole i Aust-Agder. Med stipend frå ulike fond studerte han i perioden 1930–1932 kjemi, anatomi og fysiologi ved Den kgl. Veterinær- og Landbohøjskole i København. Studieopphaldet resulterte mellom anna i avhandlinga Kalk- og fosforsyreomsetningen hos unge, voksende svin, eit arbeid som førte til at han i 1934 vart tildelt doktorgraden (dr.agric.) ved NLH.

Etter studieopphaldet i København vart Spildo tilsett som konsulent og dagleg leiar av A/S Norsk Fôrkonservering (NOFO). Dette selskapet var skipa av norske landbruksorganisasjonar og hadde skaffa seg retten til å utnytta ein finsk metode (AIV-metoden) for konservering av friskt plantemateriale til fôr gjennom ensilering. Som vestlending var Spildo sikkert vel kjend med ensilering, ein teknologi som på denne tida var lite nytta i andre landsdelar. Det nye med den finske metoden var tilsetting av syre for å få sikrare konservering og betre kvalitet av fôret. Gjennom artiklar, kurs og foredrag vart kjennskapen til metoden spreidd, og i løpet av få år kom han i bruk over heile landet.

På føresommaren 1940 vart Spildo oppmoda av Administrasjonsrådet om å ta over leiinga av det nyoppretta Produksjonsdirektoratet. Spildo heldt fram i denne stillinga til direktoratet vart avvikla i 1946.

Same året vart Spildo tilsett som administrerande direktør i Felleskjøpet i Oslo. Dei første tiåra etter andre verdskrigen var ei tid med sterk auke i etterspurnaden etter driftsmidlar i jordbruket. Felleskjøpet stod framfor store utfordringar, mellom anna med utbygging av nye anlegg for pakking og distribusjon. Spildo gjekk inn i den mangslungne verksemda med stor dugleik. Han heldt fram i stillinga til han i 1969 gjekk av med pensjon. Frå 1952 var han også formann i styret for Norske Felleskjøps Landsforbund.

Spildo tok også del i det politiske livet, både lokalt og nasjonalt. I bustadkommunen Bærum var han medlem av kommunestyre og formannskap i 1951–1963 og varaordførar i 1959 og 1962–1963. I perioden 1954–1968 var han medlem av Høgres landsstyre. Han var også med i ei lang rad råd, utval og komitear, i mange høve som formann.

Lars S. Spildo vart 1946 vald til formann i den norske avdelinga av Nordiske Jordbruksforskeres Forening (NJF), eit verv han hadde heilt til 1960. I to periodar var han også formann i hovedforeninga. Som ei påskjøning for det store arbeidet han la ned i denne samanhengen, vart han i 1963 utnemnd til æresmedlem av NJF. Han var også innvald medlem av Kgl. Vetenskapssocieteten i Uppsala og riddar av 1. klasse av den svenske Vasaorden.

• jordbruk i Noreg
• landbruk
• Felleskjøpet

• Kalk- og fosforsyreomsetningen hos unge, voksende svin, dr.avh. NLH, København 1933
• Mulighetene for å tilfredsstille våre husdyrs næringsbehov ved hjemmeavlede fôrmidler, Landbruksdepartementets småskr. nr. 46, 1936
• Bygging av siloer og nedlegging av surfôr, Landbruksdepartementets småskr. nr. 53, 1940
• Vår matproduksjon. Oppgaver som venter, i Dyrk Norge, Landbruksdepartementets småskr. nr. 63, 1941, s. 13–44

• Norske landbrukskandidaters årbok 1942–46, 1946
• Norske sivilagronomer i jubileumsåret 1959, 1960
• O. Klokk: biografi i Norsk biografisk leksikon 1, bd. 14, 1962
• K. Presthegge: NOFO. A/S Norsk Fôrkonservering 50 år. 1932–82, 1982
• R. Evju: minneord i Samvirke nr. 2/1986
• Hvem er hvem, 1979 og 1994